Shillong, Risaw, 25: Ka Hynñiewtrep Youth Council (HYC) Nongthliew Circle ha ka sngi Balang ka la ïakynduh ïa u Director jong ka Schools Education & Literacy (SEL) bad aiti ruh da ka dorkhas kaba dawa ban kyntiew kyrdan ïa ka Nongthliew Govt Secondary School sha ka Higher Secondary.
U President jong ka HYC Nongthliew Circle Bah Joplang Kharnaior haba ïakren bad ki lad pathai khubor u la ïathuh ba ka seng ka la buddien bha ïa kane ka jingdawa na ka por sha ka por bad ka long ruh ka ishu kaba la slem naduh ba ka Sorkar Jylla ka la tyrwa naduh u snem 2019 ban kyntiew kyrdan ïa kane ka skul.
“Ka thaiñ Nongthliew ka donkam bha ïa ka shlem pule kaba bha bad kaba bit babiang. Ïa kane ka skul la seng naduh u snem 1956 bad kane ka skul ka la ai jingshakri mynta palat 50 snem, kumjuh ruh kiba bun ki khun samla jong ka thaiñ ki la ïoh jingnang jingstad lyngba ka jingdon jong kane ka skul,” ula ong.
Une u nongïalam ka seng u la ai nuksa ba ka nongbah Shillong ïa mynta ka long kaba khapngiah bha, ki briew ruh ki ju ud bha ïa kane ka jingeh.
“Lada ka Sorkar ka shimkhia ban buh ïa ki tnat treikam bapher bapher sha ki thaiñ nongkyndong ka lah ban weng khyndiat ïa ka jingkhapngiap kaba la mad baroh shikatta ha nongbah Shillong,” u la ong.
Katkum ka dorkhas, ka seng ka la pynpaw ba ha ka thaiñ Nongthliew, ki don 18 tylli ki shnong bad kam pat don wat tang kawei ruh ka Higher Secondary lait noh tang kawei ka Private School.
“Ki paidbah ha ka thaiñ Nongthliew ki dei kiba im da ka rep ka riang bad kiba kham duna ka ïoh ka kot. Namarkata, ka jingdon jong ka Higher Secondary School ba la pynïaid da ka Sorkar kan long ka jingkyrkhu ïa ki longiing longsem,” ula ong bad bynrap, “ngi kyrmen ruh ba ka Sorkar kan pynurlong noh kham kloi ïa kane ka jingthmu na ka bynta ka jingbit jingbiang jong ki khynnah skul ha ka thaiñ Nongthliew.”
