Tyrwa ka tnat Arts and Culture ban pynlong “Protected Sites” ar tylli ki jaka ha EKH

Shillong, Risaw, 25: Ka tnat Arts and Culture jong ka Sorkar Jylla lyngba ka jingpynbna ba la pynmih da u Commissioner and Secretary ka tnat Arts and Culture ka Sorkar Jylla u Bah F. R Kharkongor, ka la pyntip ba ha kaba pyntreikam ïa ka iktiar ba la pynkupbor hapoh ka Section 3 (1) (2) jong ka Meghalaya Heritage Act 2012, ka Government Meghalaya ka la tyrwa ban pynbna ïa ki ar tylli ki jaka (Archaeological Sites) ha East Khasi Hills kum ki “Protected Sites.
Kine ki ar tylli ki jaka ki kynthup ïa ka Archaeological Site kaba don ha ka shnong Myrkhan kaba hap hapoh ka Mylliem Block, East Khasi Hills bad ki mawbynna (Megalith Monument) kiba don ha ka shong Rynghep, Nongkseh, East Khasi Hills.
“Kino kino ki jingujor halor kane ka jingpynbna, lada don, ka Sorkar kan pdiang hapoh lai phew sngi naduh ba la pynmih paidbah ïa kane ka jingpynbna,” la ong ka jingpynbna na u Commissioner and Secretary ka tnat Arts and Culture ka Sorkar Jylla u Bah Kharkongor.