Dawa ka FKJGP ban pynurlong noh ïaka Mawhati C&RD Block bad ka surok Sonidan-Umsiang
Hadien ka jingkular u Bah Prestone

Nongpoh, K’Lyngkot 11: Hadien ka jingkular jong u Bah Prestone Tynsong Symbud Myntri Rangbah ka jylla, haka jingïalang bala long shen ha Nongjri ban pynurlong noh ïaka Mawhati C&RD Block bad kumjuh ruh ka surok ba T.130 klur na Sonidan sha Umsiang, ka FKJGP North Khasi Hills District kala dawa naka sorkar khamtam na u Symbud Myntri Rangbah ban pynkloi noh ïa katei ka jingkular naka bynta ban pynsuk ïaki paidbah ka thaiñ Mawhati.
Haba kren sha ki lad pathai khubor naka liang u Bah Shanlang Diengdoh General Secretary ka seng u la ong ba kum ka seng kala shim ïa katei ka mat naduh ki por ba mynshuwa ban dawa naka sorkar ba dei ban buh noh ïaka C&RD Block ban pynjan sha ki paidbah ïaka jingshakri jong ka sorkar kaba dei ruh ka jingdonkam ba hakhmat eh jong ki paidbah ha katei ka thaiñ Mawhati bad kumba u Bah Prestone u la kren shai ban pynurlong noh ïa katei ka jingdawa ka seng ka kwah ba katei ka kam kan kloi bad kan urlong noh naka bynta ka jingsuk jong ki paidbah namar kumba long mynta ki paidbah naduh Mawhati Constiteuncy ki hap ban leit shaduh Umsning ban pyndep ïaki kam ki jam.
Haka juh ka por ka seng kala dawa ruh naka sorkar ba ka dei ban pynkloi noh ban siang rong ïa ka surok naduh Sonidan-Umsiang namar katei ka surok ka dei kaba la jot rathai mynta bad buh jingeh kaba khraw ïaki paidbah haka leit ka wan.