Dawa ka Dorbar Kur Syiem Nongshai ba dei ban pynneh ïa u Bah Wanphrang Syiem kum u Sirdar ka Elaka Nongpoh

Nongpoh, Jymmang 18: Hadien ka jingmih ki kynrum kynram halor ka kam Sirdar ha Nongpoh Elaka Sirdarship kaba la poi haduh u pud ba ka la don ka jingshah weng bad pynhap khet jubor noh u Bah Wanphrang Syiem Nongshai kum u Sirdar ka Nongpoh Elaka Sirdarship lah katto katne por lyngba ki bor ka District Council hadien ba ka la don ka jingujor pyrshah ïa u, halor ki rukom treikam jong u kum u Sirdar bala pynlong ruh ïaka District Council ban thung syndon da u Acting Sirdar ïa u Bah Pilar Stone Syiem Nongshai.
Na ka liang ka Dorbar Kur Syiem Nongshai haba pynshai halor kane ka bynta lyngba u Bah Phrel Syiem Nongshai uba dei u Chairman jong ka Kur Syiem Nongshai Pyllun u la ong ba ka Dorbar Kur Syiem Nongshai pyllun haka jingïadon jong ki longkñi rangbah jong ka kur Syiem Nongshai kiba kynthup naduh u Bah Spinroy Syiem Nongshai, u Bah Medras Syiem Nongshai, u Bah Webstar Syiem Nongshai ba haduh mynta hi ka Dorbar Kur pyllun ka dang don ïaka jingshanñiah ha u Bah Wanphrang Syiem Nongshai ban long kum u Sirdar jong ka Nongpoh Elaka bad ban bteng ïa katei ka kam kum u Sirdar u ban shim ïaka pateng jong ka longing na ka kur ban bteng ïaka kam kum u Sirdar.
Ka Dorbar Kur Syiem Nongshai kala pynpaw ruh ba ka dap da ka jingsngew lyngnoh halor ka jingshah weng jubor jong u Bah Wanphrang Syiem Nongshai kum u Sirdar ka Elaka Nongpoh bad kum ka kur kim don jingtip na kaei ka daw kaba la pynlong ïaki katto katne ki rangbah ban ujor sha ka District Council ban phah pynkheiñ jubor ïaka kam Sirdar naka kti u Bah Wanphrang Syiem.
Hadien katei ka jingmih ka hukum halor ka jingshah pynkheiñ jubor u Bah Wanphrang Syiem kum u Sirdar ka Dorbar Kur Syiem Nongshai Pyllun ka la pynlong ruh ïaka jingialang kur pyllun dang shen ban dang pynskhem ïaka jinglong Sirdar jong u Bah Wanphrang Syiem Nongshai.
Na ka liang jong ka Dorbar Kur jong ka kur Syiem Nongshai Pyllun ha Ri Bhoi District haba pynshai paidbah halor katei ka kam ki la ong ba kane ka kynrum kynram ka la mih dei tang ka jingbishni jong katei ka kynhun kaba la leit ujor sha District Council kaba la kam ba ki don ki kñi rangbah hynrei kim shym la dei ki kñi rangbah namar ki kñi rangbah hi lem bad ka Dorbar kur Pyllun ki dang ibit bad dang shanñiah ha u Bah Wanphrang Syiem Nongshai ba un bat ïa katei ka kyrdan kum u Sirdar ka Nongpoh Sirdarship bad kadei ruh ka hok nongkynti jong u Bah Wanphrang ban shim ïa katei ka kam kum u Sirdar ong kitei ki kñi Rangbah.
Shuh shuh ki la ong ruh ba shen ka Dorbar Kur Syiem Nongshai kan sa leit mih ruh sha District Council ban ïakren bad pynbeit ïa katei ka kam bad ban dawa ba u Bah Wanphrang u dang dei hok ban shimti ïa katei ka kam kum u Sirdar ka Elaka Nongpoh.