Da ka Committee Nongrep ka Ri Bhoi kin pynmih ïa ka Phlim part-II ba dei shaphang ka rep ka riang

Nongpoh, Jymmang 18: Ka Committee ki Nongrep na Ri Bhoi District ha ka jingïalam u Bah S.B Sban Khongjoh ryngkat ki nongrep ki la rai ban pynmih biang sa ïa ka bynta kaba ar (Part-II) jong ka phlim ki nongrep, kiba dei beit tang shaphang ka rep ka riang namar ba ki shim ba ka rep ka riang ka dei tang kawei na ka lad ban kyntiew ïa ka ioh ka kot ki nongrep ha ka District bad ha ka jylla hi baroh kawei.
Kane ka jingshim rai ka Committee ki nongrep ban pynmih sa ïa ka bynta kaba ar jong ka phlim ki nongrep, k dei ruh hadien ba na ka liang ka Committee ki nongrep ki la dep ban pynmih ïa ka bynta kaba nyngkong, kaba dei ka jinghikai shaphang ka rep ka riang bad ki la dep ruh ban pynrung wat ha ka Youtube Channel jong u Bah S.B Sban Khongjoh.
Na ka bynta ban pynmih ha ka sien jam kaba ar ïa kane ka phlim ki nongrep, ka Committee ki nongrep ha ka 15 tarik u Jymmang 2023 ki la ïa shong pyrkhat da ka Committee ha ka jingïalang kaba la long ha Pahamrioh, ha kaba na ka liang ka Committee ki la shim ïa ka rai ban pynmih biang sa ïa kane ka phlim ki nongrep ha ka bynta kaba ar, kaba dei hadien ba ki la dep ban pynmih ïa ka bynta kaba nongkong da ka jingthmu ban sam lem ïa ki jingtip shaphang ka rep ka riang na ka bynta ki nongrep hapoh ka District bad ka jylla hi baroh kawei.
Kumba la pynpaw da u Bah S.B Sban Khongjoh, ka jingangnud ka Committee ban pynmih ïa kane ka phlim ki nongrep ban shim bynta lang da ki nongrep kam dei tang kata kaba kan sah noh ha ka phlim, hynrei lyngba kane ka phlim ki angnud ban pyntip sha ki paidbah nongrep ka jylla halor shibun ki kam rep ki kam riang hapoh ka jylla.
U la pynpaw ruh da kaba ong, ba haduh kine ki sngi dang bun kiba dang kheiñ sting ïa ka kam rep ka kam riang bad ki ju poi pyrkhat pat ba ha ka jylla kiba bun hi ki nongrep bad lada ngim lah ban kyntiew ïa ka rep ka riang kumno ngin lah ban pynim ja ïa lade bad ïa ka ïing ka sem, u la ong.
Namarkata, na ka liang kane ka Committee ki Nongrep ki la pynkhreh mynta ban pynnmih sa ïa kane ka bynta bar jong ka phlim ki nongrep, bad ha kane ka phlim ki paidbah ki lah ban ioh jingtip shaphang bun jaid ki rukom rep hapoh ka jylla bad kane ka long ruh shi bynta ban ai jinghikai bad ban pynsngewthuh sha ki paidbah ba ka kam rep ka kam riang ka dei kawei na ka bynta ba hakhmat eh kaba kyntiew ym tang ïa ka ioh ka kot jong ki nongrep bad ka kyntiew ruh wat ïa ka ioh ka kot jong ka jylla, u la bynrap.