Shillong, Nailar 25: Ka Achik Holistically Integrated Krima (ACHIK) ka dawa na u Myntri Rangbah ban lum noh ïa ka jingïalang ban ïakren halor ka mat jingdawa ban pynlong ïa ka Tura kum ka Winter Capital ne ka Nongbah Tlang jong ka jylla.
Ka ACHIK ka la phah dorkhas lyngba u Deputy Commissioner ka West Garo Hills, ban pynpoi sha u Myntri Rangbah ka Jylla, ba ka ophis treikam jong u ka la kular ban lum jingïalang ban ïakren halor kane ka mat la slem bha, hynrei kam shym la don satia kano kano ka jingshim ïa ki sienjam haduh mynta bad ki la pynkynmaw ïa u Myntri Rangbah ka Jylla u Conrad K. Sangma ban lum noh ka jingïalang ban ïakren ïa kane ka mat jingdawa.
Na ka liang ka seng ka la pynpaw ba ka la ïoh ïa ka jingpynthikna ha ka jingïalang ha u snem ba la dep ha ophis u Chief Minister Mini Secretariat ha Tura bad la pyntip sha ki paidbah lyngba ki lad pathai khubor.
Halor kane ka seng ka la pynpaw ruh ïa ka jingdawa ban pynlong ïa ka Tura kum ka Winter Capital kaba dei kaba la slem bha bad kaba donkam bha ïa ki paid Garo.
Ka ACHIK ka ngeit skhem ruh ba ka jingpynlong ïa ka Tura kum ka Winter Capital kan ym pynbha tang ban shakri ïa ki paidbah lyngba ki tnad sorkar hynrei kan wanrah ruh ïa ka roi ka san ka bym noh shilliang ha ka jylla baroh kawei.
