Shillong, Naiwieng 14: Ka Skul St. George Secondary School, Nongmensong, ka la rakhe ïa ka Foundation Day kaba 32 mynta ka sngi, ha kaba la pynlong ruh ka jingrakhe ïa ka Children’s Day.
U Symbud Myntri Rangbah ka jylla u Bah Sngiawbhalang Dhar uba long ruh u nongshongshnong ka Nongmesong, uba la long u Kongsan bad u Bah PS Singh, Second in Command jong ka BSF Mawpat, u la long u Kongsan Symbud.
Ha kane ka sngi, ka skul ka la pynlong ïa ki prokram bapher bapher kum ki action song na ki khynnah skul kiba dang rit, nangta ka jingshad tynrai bad shad gispel na ki khynnah skul kiba khah heh.
Ka prokram kaba kongsan eh ha kane ka sngi, kadei ka jingpynkup burom ïa u Samla Wanborlang Wansai, uba la ïoh 100 na ka 100 ïa ka Subject Mathematics ha ka eksam SSLC mynta ka snem bad ïa u Nishan Talukdar, uba la wa ha ka kyrdan ba 17 ha ka eksam jong ka SSLC na ka MBoSe mynta ka snem.
Ki khynnah skul ki la pyni ruh ïa ka sap jingïalehkai drama jong ki ha kane ka sngi, kaba ka skul ka la don la ka jong ka Production Team.
Haba kren ha kane ka sngi, u Symbud Kongsan, u la pynkynmaw ba kane ka sngi, kadei ruh ka sngi jong ki Khynnah lane ka Children’s Day kaba dei ka sngi kha jong u Jawaharlal Nehru kaba u la ainam ïa ka sngi kha jong u kum ka Sngi jong ki Khynnah, namar ba u don ka jingieit ba kyrpang ïa ki khynnah, ha kaba ki ju ong ïa u, u Mama.
U Kongsan, Bah S. Dhar pat ha ka jngkrenb jong u, u la ong ba u sngew sarong ba kane ka skul ka la nang kiew shaphrang katba nang mih ki snem, wat lada ka jingheh lane ka compound jong ka, kam dei satia ka skul kaba heh. Pynban kane ka skul ka la pynmih shibun ki khynnah skul kiba la wan shakhmat ha ki eksam jong ka MBoSE, ha kaba la don ruh kiba wan ha ka top 20 ha ki eksam jong ka SSLC bad kumjuh ruh ki khynnah skul kiba ïoh 100 na ka 100 ïa ka Mathematics.
