Shillong, Naiwieng 14: Ka Sorkar Jylla ka la trei shitom bad ka tnat Pulit na ka bynta ban rat dyngkong shisyndon ïa ka jingwan rung u drok hapoh Meghalaya kham kloi katba lah.
ïa kane la pyntip da u Symbud Myntri Rangbah Bah Prestone Tynsong uba khmih ruh ïa ka tnat kam pohïing haba pyntip ba ka jingthang ïa ki Drok ha East Jaintia Hills ka dei tang ka jingsdang ban pynduh jait ïa u Drok bad nangne shakhmat ki paidbah kin sa nang sakhi.
“Ki Pulit ka jylla kim ïoh thiah namar ki bunkam ban ïakhun ban pynduh jait ka jingwan poi u drok hapoh Meghalaya da kaba kem ïa ki nong wanrah drok. Haba ïadei bad kiba kyrni drok, ngi donkam ka jingïarap na ki bor shnong bad kiba haïing ban pynduh ïaka jingkhaïi” la ong u Bah Prestone.
Haba kylli halor ka jingsaphriang ka video ba khaïi droks ka Kynthei ha surok GS Road mynsngi mynshai, u Bah Prestone ula ong ba um don jingtip satia ïa kane ka jingjia.
U Bah Prestone ula kyntu ïa ki riew paidbah ba lada ki don kano kano ka jingi shan khmat ïa ki briew ba khaïi droks, ki dei ban wan shakhmat bad ban pyntip sha ki bor ka aiñ. Ula kular ruh ba ki Pulit kin buhrieh ïa ka kyrteng jong kiba pyntip.
