Shillong, Naitung 27: The Central Bureau of Communication (CBC), Shillong, Tnat Information and Broadcasting, ka la pynlong ïa ka prokram Silver Jubilee ha ka lyngkhuh dap 25 snem ka Kargil Vijay Diwas, ha Raj Bhavan, Shillong.
U Lat ka jylla Meghalaya, Phagu Chauhan u la ïashim bynta ha kane ka prokram kum u kongsan ha ka jingïadonlang u GOC, 101 Area, Lieutenant General Sanjay Malik, u Additional Director General jong ka North Eastern Region (NER) Tnad NCC, Maj Gen Gagan Deep bad kiwei kiwei ki kynrem ki lyndan.
Ha ka jingai jingkren jong u, u Lat u la ban jur halor ka jinglong kyrpang ka Kargil Vijay Diwas, bad u la ong ba long kaba donkam bha ban kynmaw ïa ka jinglenlade ki shipai ba shlur.
U la ong ba u sngew donbok ban ïoh shim bynta ha ka jingrakhe silver jubilee bad u la ong ba kane ka dei ka sngi ban burom ïa ki shipai jong ka India kiba la aiti ïa la ka jingim ban ïada ïa ka ri. U la kren shaphang ka histori kaba riewspah jong ka India bad ki nongïakhih kiba la aiti ïa la ka jingim ha ki por jong ki.
U Lat u la kren shaphang ka thma Kargil bad u la kynmaw ruh ïa u Captain Keishing Clifford Nongrum uba na Meghalaya, uba la ïoh ïa ka khusnam Mahavir Chakra kum ka jingithuh ïa ka jingaiti ïa la ka jingim ha kane ka thma.
U la kynmaw kumno u Captain Nongrum u la ïoh ban shimti u lum uba kongsan bha, ha kaba u la pynïap shibun ki shipai ba ïaleh pyrshah, bad uba la duh ïa la ka jingim ha kane ka kam. U la ïaroh ruh ïa ka jingshlur jong ki shipai ka ri India kiba la ïakhun bad jop ïa ki jingïakhun ba bun ban ïada ïa ka ri.
Ka la don ruh ka jingai jingkren da u Geoffrey Nongrum, u para jong u Captain Keishing Clifford Nongrum. Ha ka jingkren shaphang ka jingkynmaw ïa u hymmen jong u, u Geoffrey Nongrum u la ong, “Watla 25 snem ka la ïaid, ngi dang kynmaw ïa u Clifford.”
“Ka jingsngewnguh ïa ka Raj Bhavan kaba la pynlong ïa kane ka prokram. Ngi don kawei ka museum kaba rit kaba pyni ïa ka jingim jong u Clifford bad ngi khmih lynti ba kane kan ai mynsiem ïa ki samla ba kin burom ïa ka jingim bad ka jingaiti jong u ïa la ka jingim,” ula ong.
“Ka khubor jong nga ïa ki samla ka long ba ki dei ban ïaleh ban don ka jingim kaba seisoh kaba wanrah burom ïa ki bad ïa ka ri bad ban kynmaw ïa ki 527 ngut ki shipai kiba la aiti ïa la ka jingim na ka bynta ka ri,” u la ong.
Ha kane ka sngi, u Lat u la plié paidbah ïa ka jingpyni ïa ki dur kaba la pynlong da ka CBC kaba pyni ia ka Kynhun Shipai jong ka India bad ki shipai kiba la aiti ïa la aiti ïa ka jingim na ka bynta ka ri. Ka CBC ka la pyni ruh ïa ka phlim lyngkot shaphang ka thma Kargil.
La pynkup burom ïa ki lahduh ha ki jingïakob quiz, elocution, bad art ba la pynlong ha kane hi ka sngi da u Rahul Chaterjee, lyngba ki jingnoh synniang na u Commander Defence PRO Wing Sreeprakash J bad kiwei kiwei ki nongshah khot sngewbha ba pawkhmat. La pynkut ïa ka jingïalang da ka jingpynkup burom ïa ki bahaïing jong u Captain Nongrum da u Lat ka jylla.
U Lieutenant General Sanjay Malik, GOC 101 Area, u la kren shaphang ka jingshlur jong ki shipai ka ri ha kane ka thma, da kaba ban jur ba ka jingshlur kalong kaba kongsan ban poi sha ka jingjop.
U Major General Gagandeep, ADG NCC NER, u la ban jur ïa ka jingkongsan jong kane ka sngi haba ka pynkynmaw ïa ka jinglenlade kaba khraw jong ki shipai. U la ong, “Kane ka sngi ka pyni ïa ka jinglenlade na ka bynta ka ri bad ka long kum ka jingkular ïalade ba man ka sienjam kan nohsynniang sha ka jingkhraw jong kane ka ri. Ka rukom kaba biang eh ban pyndonburom ïa ki jinglenlade jong kiba bun kalong ban bteng ka jingïaid ha ka lynti ka bym khwan myntoi ïalade.”
U Dr. B.D.R. Tiwari, Commissioner & Secretary sha u Lat, u la pdiang sngewbha ïa baroh ki kynrem ki lyndan bad u la kren shaphang ki bynta bapher bapher jong ka thma Kargil.
U Brigadier Vijayant Mahadik, Group Commander, NCC, u la pynpaw ka jingsngewsarong ïa ka jingïashim bynta ka NCC ha kane ka prokram bad u la ai ïa ki kyntien ai mynsiem.
U Paritosh Dixit, News Editor jong ka AIR Shillong, u la kren shaphang ka jingkongsan jong kane ka sngi, da kaba ong, “Mynta kam dei ka sngi ban rakhe hynrei ka sngi ban pynkupburom ïa ki riewshlur kiba la aiti ïalade na ka bynta ka ri. Ki la don ruh ki jingrwai ha kane prokram kaba la pynphuh pynphieng ïa ka jingïalang.
