Shillong, Nailur 01: Kumba long haduh mynta ki la don haduh 1747 tylli ki mukotduma POCSO ne ka mukotduma leh beijot ne thombor ïa ki khynnah Kynthei, ki dang sahteng hapoh ka jingbishar ha ki ïingkashari bapher bapher jong ki District ka Jylla bad ba naduh ba la treikam ka Aiñ haduh u Jylliew 2024, ia kane la pyntip da u Myntri ka Tnad Social Welfare Bah Paul Lyngdoh ha ka jubab ba la wanrah ha ka Dorbar Synrai ka ïingdorbar Thaw Aiñ ba dang shu kut shen ha ka sngi Thohdieng jong u bnai ba la dep.
Haba kren halor kane bad ban pynpaw ruh ia ki daw bapher bapher halor kane ka jingsahteng, u Bah Paul ula ong ba ki don 6 tylli ki POCSO Special Court ha ka Jylla kiba shim bishar thik tang ïa ki case POCSO kata 2 tylli ha East Khasi Hills bad mar kawei ha West Khasi Hills, West Jaiñtia Hills, Ri-Bhoi bad West Garo Hills.
Ki Judicial Magistrate ruh ki la shim bishar ïa kiwei ki mukotduma ha ka ïingkashari nalor ki mukotduma POCSO ha la ki jong ki jong ki District Court.
Kawei ruh ka daw ka jingslem ban pyndep ïa ka jingbishar ka dei namar ka jingpynsangeh ïa ka jingshong bishar namar ka jingbym wan mihkhmat da ki nong shah kynnoh, ki sakhi bad kiwei kiwei.
Na ka liang jong u Myntri u la ong ruh ba ka jingbym wan mih jong ki liang mamla namar kiwei ki daw kum ka jingpang, ki eksam bad kiwei kiwei, ki la nang pynjlan ïa ka jingbishar watla ka ïingkashari ka la shimkhia ban bishar khlem shah liang ïa baroh ki liang.
U Myntri u pyntip ruh ba palat 894 tylli ki case POCSO la dep ban bishar kut bad la pynkut noh tad haduh u bnai Jylliew 2024.
Katkum ka jingong jong u, ki don haduh 280 tylli ki case ba dang sahteng hapoh ka Juvenile Justice Board kat haduh u quarter ba kut u bnai Jylliew 2024. Kaba treikam naduh u ïaïong 2024 haduh u Jylliew 2024.
Ha kaba ïadei bad kane halor ki daw ka jingsahteng, u Bah Paul ula ong ba ka jingnang bun ki case ba donkti ki khynnah ba ïatakhuh bad ka aiñ ka la nang kynton ïa ka kam jong ka Juvenile Justice Board ban lah pyndep ïa ki case hapoh ka por ba dei kaba ïadei ruh bad kane ka bynta jong ka kam.
