Dang jah rngai u nongkiew lum na Shillong ha ka jingtwa u lum thah ha Uttarakhan nang thwet ki SRDF

Shillong, Risaw 5 : Saw ngut ki briew ki la iap, 14 ngut la ïoh ban pyllait im ha ka jingmynsaw jur bad 23 ngut ki dang jah rngai ha ka jingtwa jong u thah ha ka step Sngi Ba Ar ha ka por 8.45 baje katba ki dang wan phai na ka jingkiew ïa u lum Draupadi Ka Danda II ha Uttarakhand bad ka jaka ba u thah u twa ka dei na ka kynjang kaba 5670 Metre. Ha kane ka jingjia uwei na ki nongkiew lum ba pawnam na ka jylla u bah Tiklu Jyrwa ruh u ïadon ryngkat bad ka kynhun kaba 41 ngut kaba kynthup ia 34 ngut kiba shah hikai ha ka Nehru Institute of Mountaineering (NIM) Uttarkashi bad 7 ngut ki Nonghikai (Instructor).
U bah Tiklu Jyrwa u dei u dkhot jongka Meghalaya Sport Climbing and Mourtaineering Association (meSCMA) bad la bei pisa ruh ïa u dang ka tnad kam Sport jongka jylla ban leit ïashim bynta ha katei ka jingkiew lum. U dei uba shong ba sah ha Upper Lumparing bad u la don arngut ki khun.
Na ka liang ki dkhot ka State Disaster Response Force (SRDF) bad ki dkhot na ka NIM, ki bor shipai bad bor pulit ki la hiar da ki helikopter mynta ka sngi ha utei u lum hadien ba ki la ïohi ba ki don 10 ngut ki briew ha ka juh ka jaka. Na kitei ki la ïoh ban sei saw ngut bad kine baroh sawngut ki la khlad noh. Hadien kane da ka jingtrei shitom ki la ïoh ban pyllait im ïa ki 14 ngut kiba la shitom jur bad kiba dang jah rngai kat haduh ba thoh iaka khubor ki dang don sa 23 ngut.
Kat haduh ba thoh ïa ka khubor ym pat ioh jingtip la u bah Tiklu u don hapdeng kitei kiba mynsaw ne u dang jah rngai namar ka jingwad ka dang bteng wat la ka jingpynthut jongka mariang namar ka jingdum lyoh ruh. ïa kitei ki 14 ngut kiba mynsaw la wan kit da ka helikopter sha ka 2nd Battalion ITBP Uttarkashi, Matli Helipad.
Na ka liang u myntri rangbah ka jylla u Conrad Sangma, i lok, ki khun, bad baroh kiba haïing hasem ki lok ki jor bad ki paid nongshong shnogka jylla ki buh ha ki jingduwai ba u bah Tiklu un lait im na kane ka jingjia ba sngewsih.
La ïathuh ba kane ka kyhun kaba 41 ngut ba don lang u bah Tiklu, ki leit ban kiew ïa une u lum Draupadi Ka Dhanda II bad kane ka jingkiew ka dei hadien ba ki la pyndep ïa baroh ka jingshah pyntbit (training) ha NIM. Phewse dei ynda haba ki la khreh ban wanphai na ka jaka ba ki la dep ban kiew ïa une u lum, la ong ba san kynsan ka la jia ka jingtwa noh ka jong u thah (avalanche), ha kaba kane ka kynun ki la sahkut noh shalor une u lum.