Dang ha suiñ ka jingpyndep ban tei ïa ka Ïingdorbar thymmai

Dangsah ki lyngkhot lyngkai u tnum ba khyllem bad pat ïoh jingmynjur ka design thymmai

0

Shillong, Lber 13: Wat la ka jingthmu ban pyndep ïa ka Ïingdorbar ba thymmai jong ka jylla shuwa ban kut ka por jong ka Ïingdorbar ba la dep ka la pulom noh na ka daw ka jingkhyllem ba kynsan kynsan u tnum pyllun (dome) jong ka Ïingdorbar ba thymmai ha u bnai Jymmang jong u snem ba la dep ka la jan kot sha ka shisnem hynrei la sngewthuh ba ka jingpyndep ïa kane ka ïingdorbar ba thymmai kan dang bampor hi.
Haba u Lamphang ka Ïingdorbar thaw aiñ ka jylla u ïakren bad ki lad pathai khubor ha ka ophis treikam jong u hadien ba u la dep wan jurip ïa kane ka ïingdorbar ba dang tei ha maw ha ka sngi Nyngkong u la pynpaw ba ka desgin kaba thymmai kam pat shym la ïoh jingmynjur satia na ka IIT Roorkee bad IIT Guwahati bad wat ki lyngkhot lyngkhai dewbilat bad ki nar bad kiwei ki jait tiar jait tar ba la pyndonkam ban shna ïa une u tnum pyllun ba la khyllem noh ka ïingdorbar ym pat dep satia ban weng.
“Nga la bthah ïa Public Works Department (Building) ba kan pynsted ïa ka jingïoh jingmynjur na ki artylli ki IIT ïa ka design thymmai jong u tnum pyllun ka ïingdorbar namar khlem ka jingmynjur kine ar ym pat lah satia ban sdang biang ïa ka jingpyntrei,” ong u Thomas A sangma haba kren sha ki lad patahi khubor.
U Lamphang u la pynpaw ba ha ka jingleit jurip jong u u shem ba ka jingpyntrei ka long kaba ihun, “hynrei ka jingpyntrei ïa ka bynta ba hapdeng ym pat dep eiei namar ka jingkyllem noh u tnum pyllun hynrei ki bynta ba sha ka mon bad ka diang ki la dep kumba 80%”, u la ong.
“Lada ym pat dep ïa kane ka bynta pdengduh kaba la pynwandur ban dei ka jaka shongdorbar kam don jingmut than ka jingpyndep ïa kiwei ki bynta,” u la bynrap.
Shuh shuh u la pyntip ba na ka liang jong u un sa shim ïa ki sienjam ban thaw biang ïa ka High Powered Committee (HPC) kaban peit ïa ka jingpyntrei ïa ka ïingdorbar.
Haba la kylli la ka don ne em ka jingbuhpor ïa ki kompeni ba pyntrei ïa kane, “Kaba ngi buhpor ka long ba tang ka jingweng ïa ki lyngkhot lyngkhai kiba mih na ka jingkhyllem u tnum pyllun ba ki dei ban pyndep ha lane shuwa ka 15 tarik Ïaiong,” jubab u Lamphang.
“Ka jingbuhpor ka long tang ban weng ïa ki lyngkhot lyngkhai namar lymda la lah ban weng shuwa yn ym pat lah ban sdang biang ïa ka jingtrei bad katba ym pat ïoh jingmynjur ïa ka design ruh yn ym lah satia ban ïaid shakhmat ïa ka jingpyntrei. Namarkata, ka jingbuhpor lano yn lah ban pyndep ka dei beit ynda la ïoh sdang ban pyntrei biang,” u la bynrap
Haba ïadei bad ka jingkynnoh bamsap ïa ka jingpyntrei ïa kane ka ïingdorbar thymmai u Lamphang u ong ba na ka liang jong u yn ym mynjur satia ïa kaba kum kata ka jingkynnoh kaba tang ha ki saw lyer.
“Kaba kum kata ka jingkynnoh bamsap kam pat poi sha shkor jong nga hynrei nga kwah ban ong ba lada ka don kano kano ka jingkynnoh ruh ka dei ban dei da ki lynti kiba shai da kaba wanrah ki jingujor da ki jingthoh ne ki sabut ym ban shu ngeit ïa ki khubor ba ïohsngew na ka diang ka mon bad lada ka don shisha kaba kum kata ka jingkynnoh ruh ngi kloi ban peit ïa kata ban wad jingshisha,” u la ong.
Shuh shuh u la ong ba ka jingshu shongwai beit ka dorbar ïa ka jaka pynlong dorbar ka dei kaba u kwah ba kan kut noh ka ka kynti ba u bat Lamphang ba la kumno kumno dei ban lah beit ban rah noh ïa ka jaka long dorbar sha ka Ïingdorbar thymmai bad kaba pura.
U la ong ruh ba katba kane ka jingpyntrei ïa ka bynta nyngkong u kwah ruh ba ka jingpyntrei ïa ka bynta ba ar jong ka ïingdorbar.
“Katba kane ka jingpyntrei ïa ka bynta nyngkong ka dang ïaid sha khmat nga kwah ruh ba ki bynta ba ar jong ka jingtei ba kynthup ka jingshna ïa ki basa ki nongtrei, ka basa ki myntri sorkar, ka jaka sah u Lamphang, ka MLA hostels, ka hospital, bad school ki la dei ban sdang noh ym ban ap haduh da dep ka bynta ba nyngkong,” u la ong.
Lah ban pynkynmaw hangne ba u tnum pyllun ka ïingdorbar ba dang pyntrei ka dang ïaid shait shai bad ka jia noh ka jingkhyllem ka ka step phyrngap jong ka 22 tarik Jymmang 2022 katba ka jingpyntrei ka dang ïaid shait-shait sa ban poi ha ka jingpyndep noh syndon ïa une u tnum pyllun.

Leave A Reply

Your email address will not be published.