20 haduh 28 tarik ka dorbar mangtyngka lada donkam shong dorbar haduh shiteng synïa ruh ngin ïapeit: Thomas

Shillong, Lber 13: U Lamphang ka Ïingdorbar Thawaiñ ka jylla u Thomas A Sangma ha ka sngi Nyngkong u la pyntip ba ka dorbar mangtyngka jong ka ïingdorbar thawaiñ ka jylla kan sa sdang aduh ka 20 tarik Lber bad pynkut pat ha ka 28 Lber. Ïa kane u Lamphang u la ïathuh hadien ba la wai ka jingïalang ka Business Advisory Committee (BAC) ha kamra treikam jong u kaba don ha Khyndailad.
Ha kane ka jingïalang ka BAC la wan shim bynta da u Symbud Myntri Rangbah ka jylla ba peit ïa ka Parliamentary Affairs u Bah Prestone Tynsong, u Myntri barim ki kam pohïing u Bah Lahkmen Rymbui, ki MLA na liang pyrshah ba kynhtup ïa u Bah Charles Pyngrope na ka AITC bad u Dr Celestine Lyngdoh na ka Congress.
“Ha ka jingïalang ngi la rai ban wanrah beit da ka mangtyngka ba pura bad ngin bud beit ïa ki rukom kiba ngi ju leh ha kaba ïadei bad ka kheiñ ka diah bad ka mangtyngka,” ong u Lamphang.
“Kumba phi la tip ba u snem mangtyngka kan kut ha une u bnai bad kumta ki ophisar bad ka sorkar ki donkam ban pynkhuid noh phar ïa kano kano ka kam sahteng kaba ïadei bad ka pisa pilaiñ dei na kane ka daw ngi la rai ban pynkut ïa ka dorbar mangtyngka ha ka 28 Lber khnang ba ki nongtrei naduh ka 29 haduh 31 Lber kin ïohpor ban pynkhuid ïa baroh ki kam ba sahteng,” u la bynrap.
U la ïathuh ha kane ka jingïalang la rai ba 5 sngi jong ka sngi shongdorbar la rai ba kin dei ki sngi ba ka sorkar kan pyndep ïa ki kam na ka liang jong ka katba ki arsngi pat ki sngi shong dorbar kan dei ki sngi ba ki dkhot ka Ïing kin lah ban rah ïa kino kino ki mat ïatai ba ki sngew donkam.
Haba kylli la kane ka dorbar kam lyngkot than ban shong tang 7 sienshong, u Lamphang u la ong ba ka sngi ka la biang namar ka por ka la kham thmit.
“Lada don kino kino ki mat ïakren na ka liang ki dkhot kaba ki kwah ban rah ngi la rai ban pynduna ha kane ka dorbar kaba mynta hynrei ngin pdiang pat ha ka dorbar synrai kaba dang ap shakhmat,” u la ong.
“Ha Parliament ki don ki sngi kiba ngi shong dorbar haduh shiteng synïa ruh bad nga ngeit ba lada ngi ïohi ba ka don kum kata ka jingdawa ruh ngin pyrshang ban bud ïa kane ka rukom lada ym dei haduh shiteng synïa ruh hynrei haduh da kem iongreiñ ne katba shah ka kam,” u la bynrap.
U Lamphang u la pyntip ruh ba na ka liang jong u u la ïoh pdiang ïa ka shithi jong ki ar tylli ki seng saiñ pyrthei kata na ka Congress bad ka All India Trinamool Congress (AITC) kiba la tyrwa sha u ba un ai jingithuh ïa ki kum ki liang pyrshah.
“Nga la ïoh ïa ka shithi na ki ar tylli ki party ka Congress bad ka TMC ba kin shong ha ka liang pyrshah hynrei na ka Voice of the People Party (VPP) kam pat ai jingtip eiei halor ka rai shong liang pyrshah bad kim wan ai jingthoh ruh ban ai jingithuh ïa ki kum ka Liang pyrshah,” ïathuh u Lamphang.
Haba ïadei bad u Nongïalam Liangpyrshah u Lamphang u la ong ba u dang peit ïa ki kyndon jong ka aiñ namar kumba long mynta kine ki party kim wan kum kawei ka kynhun hynrei la kajong kajong.
Shuh shuh u la pyntip ruh ba la rai ba ïa ka jingjied ïa u Symbud Lamphang jong ka Ïingdorbar Thawaiñ yn sa pyndep ha ka sngi ba sdang ka dorbar kata ha ka 20 tarik.