Shillong, Jylliew 25 : U Myntri Khynnah jong ka Ministry of External Affairs, u Pabitra Margherita ha ka sngi Balang u la ong ba ïa ka jingdawa Inner Line Permit (ILP) jong ka Meghalaya ka dang don mynta ha ka jingbishar jong ka sorkar pdeng.
Haba kren bad ki lad pathai khubor u Myntri Khynnah u la pynshai ruh ba kam dei satia ba ka sorkar pdeng ka sngap kuman ïa kane ka jingdawa. “Ki don bun ki ishu kiba ïadei bad ki jylla jong ka thain shatei lam-mihngi jong ka Ri kiba la sahteng bad sahkut da ki phew phew snem,” u la ong.
U Margherita u la pynpaw ruh ïa ka ishu kaba ïadei bad ka ILP yn sa pynbeit da ka sorkar pdeng hapoh ka jingïalam jong u Myntri Rangbahduh ka Ri, u Narendra Modi. “Hapoh ka jingïalam ba shemphang jong u Myntri Rangbahduh ka Ri u Narendra Modi, ïa kine ki ishu yn sa pynbeit kawei hadien kawei,” u la bynrap shuh shuh.
