Shillong, Jylliew 25: U Myntri Rangbahduh ka Ri u Narendra Modi ula pynpaw ïa ka jingsngewnguh ïa ka jingïoh pdiang ïa ka jaiñ Ryndia kaba la ai sngewbha da u Myntri Rangbah ka Jylla u Conrad K. Sangma bad ula ong ba kane kadei ka shab jong ka jingriewspah ka Jylla ïa ki jingdon jingem kiba rim bad ka jingsarong.
Ha ka shithi kaba la phah ha ka 24 tarik u Jylliew 2025, u Myntri Rangbahduh ula pynpaw ïa ka jinglong kongsan ïa kane ka jingai sngewbha bad bynrap ba ka don ka jingdawa kaba jur ha ka pyrthei baroh kawei ïa ki mar kiba ïai neh bad kiba la pynmih tynrai kum ka jaiñ Ryndia. Ula ong, “Ka rukom pyrkhat ka jong phi ka long kaba ktah bha bad ka long kaei kaei kaba dei ban ai jingïaroh”.
Haba pynpaw ïa ka jingkongsan ïa ki mar kiba ïadei bad ka mariang bad kiba don ruh ïa ka jingkitkhlieh ha ka imlang sahlang, u Modi ula ong, ba ka jaiñ Ryndia ka ïeng kum kata ka bym ktah than ïa ka mei mariang bad kadei ka rukom pynmih tynrai. Ula kdew ruh ba ka jingai dang shen ïa ka shap Geographical Indication (GI) ïa ka Jaiñ Ryndia, kadei ka lynti ban ïaid shakhmat ha ka ban kyntiew ïa kane ka mar kaba la pynmih tynrai da ki paid riewlum ha ki rynsan jong ka pyrthei.
U Myntri Rangbahduh ka ri ula pynkynmaw ruh ïa ka jingwan jngoh ka jong u ïa ka jylla Meghalaya, ula ïaroh ïa ka rukom long ki briew, ka jingitynnad jong ka Jylla bad ïa ka jingtbit jong ki samla.
“Haba nga wan jngoh ïa ka Meghalaya, nga dap da ka jingsngewkmen ïa ka jingieid jong ki paidbah, ka jingitynnad jong ka mariang bad ka jingtbit jong ki samla kiba khlaiñ,” ula thoh ha ka shithi kaba la phah sha u Conrad K Sangma.
Haba ïengskhem ha ka jingkular na ka bynta ka jingkiew jong ka Meghalaya u Modi ula ong, “Ryngkat lang, ngi ngin ïa bteng ban shakri ïa ki paidbah ka jylla bad ban pynthikna ba ka Meghalaya kan leh ïa ka bynta kaba khraw ha ka ban thaw ïa ka Viksit Bharat.”
Na ka liang u Myntri Rangbah u Conrad K Sangma ula pynpaw ïa ka jingsngewnguh ïa u Myntri Ragbahduh ka ri u Narendra Modi halor ka jingithuh ïa ka ‘Ryndia’ – ka jingïoh shap ka Meghalaya na ka GI ïa ka Eri silk, kaba la thaiñ da ki longkmie jong ka Ri Bhoi District.
Haba thoh ha ka X, u Sangma ula ong, “Nga sngewnguh ïa u Myntri Rangbahduh ka ri u Narendra Modi halor ka jingithuh ïa ka Ryndia — ka jingïoh ka Meghalaya ïa ka shap na ka GI ha ka Eri silk, ka jingthaiñ kti jong ki longkmie jong ka Ri-Bhoi District. Nga ai khublei ïa ki nongpynwandur KINIHO kiba la shna pynwandur ïa ka jingdon jingem kaba rim da ka jingsumar bad ka jingtbit”.
U Conrad Sangma ula pyllait ruh ïa ka shithi kaba la ïoh pdiang na u Myntri Rangbahduh ka ri uba la pynpaw ïa ka jingsngewnguh ïa u Myntri Rangbah halor ka jingai sngewbha ïa ka jaiñ Ryndia kaba long ka shap jong ka Meghalaya jong ka jingdon jingem kaba rim bad ka jingsngew sarong ïa ka ri baroh kawei.
