Dang ap jubab na ka sorkar pdeng halor ki samla pule doktor ba shah ktah na jingjia ha Manipur

Shillong, Nailar 23 : Ka sorkar jylla mynta ka dang ap ïa ka kaiphod na ka sorkar pdeng haba ïadei bad ki samla pule doktor na Meghalaya kiba shah ktah na ka jingïakynad ha Manipur.
Halor kane ka bynta, u Myntri Rangbah haba kren bad ki lad pathai khubor u la ïathuh ruh ba u la thoh sha u Myntri ka tnad ka Koit ka Khiah jong ka sorkar pdeng ba pynlong noh ïa ka North Eastern Indira Gandhi Regional Institute of Health and Medical Sciences (NEIGRIHMS) lane kino kino ki jaka pule doktor jongka sorkar pdeng kum ki jaka pule na bynta jong kitei ki samla pule.
“Na ka liang u Myntri ka Sorkar Pdeng u la ai ka jubab kaba don jingkyrmen ha katei ka sngi da kaba pynpaw ba um dei tang ma u ïalade hynrei baroh baroh ki la kren shaphang katei ka bynta bad ba ki ladep ruh ban ïa kren hapdeng ki para mynti ha ka sorkar pdeng shaphang katei ka ishu bad kumta ki la sngew dei bad ïahap jingmut tangba kim pat shim pat ïa ka rai kaba khatduh kumba ka dei,” la ong u Myntri Rangbah.
U la ïathuh ba ki la kynduh ruh ïa u Myntri ka tnad Kam Rep ka jylla bad ma u ruh mardor u la pyni kajuh ka dak kaba ki khmih lynti ba kan long kaba ai jingkyrmen.
Ha kajuh ka por u la ong ruh ba ka don ruh ka jingsngewsyier haba ïadei bad ka jingshngai jong ki samla pule bad ong ba na ka liang ka sorkar pdeng bad ka sorkar jylla ki shimkhia na ka bynta ka jingshngain jong ki samla pule bad pyntikna ruh ba kin don beit hapoh kut.