Shillong, Nailar 23 : U Myntri Rangbah ka jylla, Conrad K Sangma ha ka sngi Balang u la pynpaw ïa ka jingkmen hadien ba ka Indïa ka la lah ban poi tiak haduh u bnai ïa kaba la tip kum ka Chandrayann-3 Mission.
Haba kren bad ki lad pathai khubor hadien ba la wai ka jingïalang ha ka nongbah, u Myntri Rangbah u la ong ba katei kadei ka khyllipmat kaba kmen tang ïa baroh ki nong India bad kumta ma u ruh u dei uwei na kita ban sngew sarong halor katei ka jingjop.
“Ngin dei ka Ri kaba saw ha ka pyrthei baroh kawei kaban la jop ban ïuhkjat ha u bnai bad ka ri kaba nyngkong pat ban poi tiap haduh ka bynta ba shathie (south pole) jong u bnai,” u la ong.
Kumta u la ong ba kane kadei ka sienjam kaba khraw tam na bynta ka India bad ka khubor kaba shai bad kaba khlain sha ka pyrthei halor ka jingnang kiew ka India bad ruh ba ka India mynta kadei kawei na ki ri kaba hakhmat eh kaba don ïa ki kor ki bor ban phah sha u bnai.
