Dang ailad ka ïing bishar High Court ka jylla ban ïa pynbeit shwa ka sorkar bad ki Harijan
Halor ka jingpynkynriah ïa ki 342 tylli ki long ïing na Them ïew Mawlong
Shillong, Iaiong 8 : Ka ïing bishar High Court jongka jylla mynta ka Sngi Ba Ar ka la pynwai bad pynkynriah shwa ïa ka jingbishar ha kaba ïadei bad ka jingpynkhreh ban pynkynriah ïa ki 342 tylli ki long ïing Harijan na Them Iew Mawlong, shaduh ka 28 tarik Iaiong kaba long kum ka jingailad biang ïa ka sorkar jylla bad ïa ka Harijan Panchayat Committee (HPC) ban wad ki lad ki lynti ban iïa pynbeit ïa kane ka kam shabar ka ïing bishar.
Ki nongbishar kiba kynthup ïa u Chief Justice IP Mukherji, u Justice W.Diengdoh ha ka hukum ba ki la pynmih mynta ka sngi la ong “ Da ka jingmynuur lang ki nongïasaid aiñ jong baroh arliang ïa kane ka jingbishar la pynwai bad pynkynriah shwa shaduh ka 28 tarik Iaiong 2025 ban ailad ïa baroh arliang ban wad ki lad ki lynti ban ïa pynbeit shwa paramaki ïa kane ka kam.
Ha ka jingshisha na ka liang ka sorkar jylla ka la kyrpad ïa ka sorkar pdeng lyngba ka tnad kam ïada ri ban ai ïa jaka kumba 2.5 lane 3 acre kaba dei ka jaka ba la shu ieh shrah kaba don pyrshah ka Petrol Pump ïew Mawlong.
U Myntri Rangbah dang ha ka 22 tarik Kyllalyngkot mynta u snem u la ïathuh ba ka sorkar ka la kyrpad ïa ka tnad kam ïada ri jognka sorkar pdeng ban ai jaka ban pynkynriah ïa kitei ki 342 tylli ki long ïing Harijan na Them ïewmawlong hynrei ki don katto katne ki kyndon jong ki shipai kiba long ki juh ha baroh kawei ka ri kaba buh ïa ka tnad kam ïada ri ha ka jingeh ban ai ïa kane ka jingkyrpad ka sorkar jylla.
Na ka liang u Symbud Myntri Rangbah uba peit ïa ka tnad kam pohïing u bah Prestone Tynsong pat ha ka 17 tarik Kyllalyngkot u la ïathuh ba lada ka sorkar kam ïoh ïa ka jaka na ki shipai kam banse ban pyntreikam beit da ka jaka ba la dep pynkhreh ïa ka blue print kaba dei ha ophis jongka Municipal. Kat kum kane ka blue print ka sorkar ka la rai ban shna da ki ïing bun mala ha katei ka jaka ba heh 2.5 acre jongka Shillong Municipal Board ban pynkynriah ïa kitei ki 342 tylli ki long ïing. Ka jingthmu ka long ba ka sorkar kan pynpra noh ïa ki ïing rim ha Them ïew Mawlong bad kan shna noh da ka Complex bad jaka ïeng kali.