Da ka lynti ka aiñ maham u CM ba khang tala ka HYC ïa ka ophis u Director ka NEIGRIHMS

Shillong, Iaiong 8 : U Myntri Rangbah ka Jylla Conrad K Sangma ha ka sngi Ba-ar, ula shim khia ïa ka jingleh donbor jongka seng Hynniewtrep Youth Council (HYC) dang shen ha North Eastern Indira Gandhi Regional Institute of Health & Medical Science (NEIGRIHMS) da kaba leit khang tala jubor ïa ka kamra ophis jong u Director bad u la ong kum kane ka kam ka long ka bym lah ban pdiang bad kular ba ka Sorkar ban leh eiei da ka lynti ka aiñ pyrshah ïa ki briew kiba donkti ban pynthut ïa ka jingtreikam ka Hospital.
Kane ka jingkynthoh u Myntri Rangbah kala mih hadien ka jingleit ïakhih jong ka seng HYC bad jingkhang tala ïa ka Ophis u Director ka NEIGRIHMS, halor ka jingkynnoh ba kane ka Institute kam shym la lah ban pynbeit ïa ki kam kiba ïadei bad ka thungkam thungjam ïa ki nurse.
Haba ïakren bad ki nongthoh khubor, u Conrad ula ong “Nga shim (ïa ka jingleh ba dang shen) kum ka kam ka bym lah ban pdiang. Wat ha ka por thma ka don ka jingniew burom ba ki shipai jong kano kano ka ri kim lah ban hiar thma ïa ki hospital. Nga sngewsih bha ban ïohi ba ka jingtreikam jong ka hospital la wan ban tuklar bad kam pher la ka dei ka daw aiu aiu ruh, haba kut ka sngi, lada phi leh ïa kine ki kam, ki dei ki paidbah bad ki nongpang ki ban jynjar bad na ka jingsngew para briew, kane ka dei kaei kaei ka bym lah ban pdiang. Nga kren shai halor kane”.
“Ki lah ban don ki daw, ki lah ban don ki jingïapher jingmut hynrei ki don ki lynti ban pynbeit ïa ki” ula ong.
“La ka dei ka Sorkar Jylla ne ka Sorkar Pdeng lane kano kano ka Institute kim ju kiar na kano kano ka jingïakren haba mih kino kino ki ishu bad ngi la pynshisha ïa ka bad ngi la pyni ruh ha ki por bala leit noh bad ngin ïai bteng ban ïakren hadien habud hynrei ban leit tuklar bad ban shu pynthut ïa ka jingtreikam ka hospital ka dei ka bym pat ju leh mano mano ruh” ong u Myntri Rangbah.
“Kumba nga ong, ngam mynjur ïa kane bad kumba nga ong ki Pulit kila shimkhia ïa kane da ka lynti jong ka aiñ bad kila dep ban register ïa ka case bad ki Pulit kila shim ïa ki sienjam kat kum ka aiñ bad kat kum ki sakhi kiba ïoh lum ngin sa leh eiei pyrshah ïa ki briew kiba donkti” ula bynrap.
U Myntri Rangbah ula ong “Kumba nga ong, ngim ju kiar ban ïakren ïa kino kino ki ishu, ngam ong ba ki ishu ba ki wanrah ka dei ka bym donkam lane ba donkam hynrei kane kam pynksan ban shu leit tuklar ïa ka jingtreikam jong ka hospital bad lada don ki jingsngewkhia, ki don kiwei pat ki lynti ban ïakren hynrei ban shu pynsangeh ïa ka jingtreikam ka hospital kam dei satia ka lynti”.