Nongstoiñ, Rymphang, 17: Ha ka sngi thohdieng ki nongïalam jong ka Hynñiewtrep Youth Council, ki la hiar sha Riangdo Mawshynrut West Khasi Hills, ban pynshai sha ki paitbah ba shwa ba kin mih ha ka 27 tarik ban leit thep ïa ka vote, ki dei ban da pyrkhat bad puson ba namar lada ki bakla ha kane ka kynti ka jingbabe bad ka jingtim kan long ïa ka pateng ban wan.
U Bah Robertjune Kharjahrin President rangbah ka seng, haba pynshai paitbah u la ong, “Kum ki nongshong shnong jong ka jylla, ym lah ban len ba da la ki jong ki kti ngi iada ïa la ka ri bad da la ki jong ki kti ngi teh mraw ïa la ka jong ka ri. Namar ba ngim shym la jied ïa kita ki nongmihkhmat kiba don ka jingkitkhlieh ïa kiba duk ba rangli kiba shem lanot bad kiba lait na ka bamsap”.
U la ong ruh, “Ban saiñ dur ïa ka lawei ka jong ki khun ki kti, ka shong ha ngi ki kmie ki kpa bad lada ngi bakla ha ka 27 tarik ban jied ïa ki nongmihkhmat, ngi pynap liew lep na ka bynta ka pateng ban wan. Da puson, da bishar bniah bad pynshong nongrim bha shwa ban thep Vote ha katei ka sngi”, bad bynrap, “Lada ki paitbah ki dang ïakmen bad shah kynting ha ki sbai rupa jong kita kiba kam ïalade ba ki dei ki riew ieit ri, kan long kum ka jingshet kylla ïa ka pateng ban wan”.
Utei u nongïalam ka seng u la ther tyngeh ruh ïa ka jingkren lap lah jong ki nongmihkhmat jong kine ki san snem ba la dep, ha kaba ki la ong ba ki nongmih-khmat ba mynshuwa kim shym la leh ei ei bad dei kane ka sorkar kaba mynta bad ki nongmihkhmat kiba la lah ban wan rah haduh katne ki kam pynroi.
U la buh jingkylli ruh ba hato ïa ka ophis u Deputy Commissioner jong ka West Khasi Hills kam dei kaba la don naduh mynshuwa. Hato ka National Highway Shillong-Tura ka dang don mynta?. Hato ki skul bad ki college ki dang don mynta ne ki la don lypa naduh mynshuwa? Hato ïa ka Mawshyrut Civil Sub Division dang ïoh mynta?.
Nalor kata u la ong ruh ba ka jingkam ba ki pynïoh surok ka dei tang kum kaba shu pushara najrong, namar ba baroh ki surok ha West Khasi Hills ki dei kiba la dep trei lypa naduh ka sorkar ba mynshuwa ym kane ka sorkar MDA, hynrei katta ruh ki dang sngew sarong.
Utei u nongïalam ka seng u la ong ruh ba ka long jingjah burom kaba khraw ïa kane ka sorkar kaba mynta, namar dang ha ka sngi palei u Amit Shah Myntri kam pohïing ka sorkar pdeng, u la ther tyngeh da kaba ong ba ka jylla Meghglaya ka dei ka jylla kaba wan ba nyngkong ha ka jingbam sap na baroh ki jylla ka thaiñ shatei lam mihngi. Ka dei ruh ka jylla kaba wan ha trai duh ha ka liang ka pule puthi hato ki paitbah ki dang sngewdei ban jied ïa ka sorkar kaba kum kata?.
U la ther tyngeh ruh ha kaba ïadei bad ka soskular pynbeit pud, namar ka sorkar Meghalaya ka la shu kohnguh katba ong ka sorkar Assam. Nalorkata ka la pynlong ïa ka hima Nonglang Sirdarship bad kiwei pat ki hima ba ki hap ban mudui da ka mokut-duma haduh Supreme Court kaba ki hap ban pynlut da ki lak tyngka.
