Ha jingrakhe Financial Literacy ka RBI pynïoh jingïarap pisa ki Bank haduh 2.03 klur ha WJH
Jowai, Rymphang 17: Ka Reserve Bank of India (RBI), Shillong kala pynlong ïa ka prokram kaba la tip kum ka Field Level Financial Literacy Event kaba long shi bynta na ka jingrakhe ïa ka taiew jong ka Financial Literacy 2023 kaba la rakhe lang ha baroh shityllup ka ri India. Lyngba kane ka prokram la pyllait pisa na ki Bank haduh Rs.2.03 klur sha ki 84 kynhun ki nongïoh bynta.
Ïa kane ka prokram la pynlong ha Dorbar Hall jong ka shnong Sabahmuswang, Thadlaskeiñ Block jong ka West Jaiñtia Hills District ha kane ka 14 tarik mynta u bnai, ha kaba la wan ban plie paidbah da u bah Olden Nongpoh uba dei u General Manager bad Officer-in-Charge {CM(O-i-C)} ka Reserve Bank of India, Shillong ha ka jingïadon ryngkat i Block Development Officer (BDO) Thadlaskeiñ, DDM bad kiwei de ki heh sorkar.
Ki nongkren ha kaba ka sngi naduh u bah Nongpoh bad i BDO ka Thadlaskeiñ kila pynshai sha ki nongwan ïashim bynta ha kane ka prokram shaphang ki jingmyntoi ban tip ia ka jingkynshew pisa lyngba ka jingpyndonkam ïa ki Bank.
Ki nongtrei jong ka RBI, Shillong kila batai shai ruh ïa kiba la poi sha kane ka prokram, shaphang kiei ki bynta kiba dei ban leh bad kiei ki bym dei ban leh na ka bynta ka jingshngaiñ lyngba ki digital banking, ki jingeh jong ki nongthep pisa bad ruh ban tip kumno ban kiar na ki nonglehthoh leh shukor ïa ka pisa jong ki.
Ki la don kumba 80 ngut ei ei ki nongiashim bynta kiba kynthup ïa ki nongrep, ki dkhot jong ki SHG, ki nongsengkam ba rit, bad kiwei de kila poi ïashim bynta ha kane ka prokram.
Ha kane ka sngi la sam jingïarap pisa sha ki 84 kynhun kiba wan ïashim bynta bad kane ka song pisa kala kot haduh Rs. 2.03 klur tyngka ïa kaba la bei da ki Bank kiba treikam sha kane ka thaiñ. Don ruh katto kattne kiba la pynïoh da ka RBI, Shillong.
Ka la don ruh ka jingpynïakop jingkyntip (Quiz) bad ïa ki nongjop la sam da ki pla (bags) kiba don bad ki jingthoh shaphang ka Financial Literacy da ka RBI, Shillong.
Haba pynkut ïa kane ka prokram ki nongpynïaid jong ka RBI kila ai ka jingkhublei kyrpang ïa ki nongïashim bynta, ïa ka Dorbar Shnong, ki nongtrei jong ka Thadlaskeiñ Block, ki nongtrei jong ki Bank bapher bapher kiba la pynlong ïa kane ka prokram kaba jop.