Da lei lei ruh ngin ym pdiang ban long dkhot Expert Committee da ki briew ba na bar : Banteidor

Shillong, Nailar 22 : U MLA ka Mawkynrew Constituency uba dei u Adviser jong ka tnad Agriculture u bah Banteidor Lyngdoh u la ong ba ka jingthmu ban thung dkhot da kiba nabar ka jylla ha ka Expert Committee ban bishar ïa ka Reservation Policy ka long ka bym lah pdiang da lei lei ruh namar kumno kiba na bar kin wan ban tuklar ïa ka kam pohïing ka jylla haba kim tip ïa ka dang ka duh ruh bad kin ym long kiba shemphang bad sngewthuh shaphang ki paid Khasi, Jaintia bad Garo.
“ Ngin ym ailad da lei lei ruh ban wan long dkhot da ki briew ba nabar ha ka Expert Committee ka ban bishar ïa ka Reservation Policy. Namar kane ka dei ka kam iap kam im jong ki trai shnong ka jylla bad ki briew kiba nabar kin ym tip bniah, shemphang bad sngewthuh shaphang ka jinglong ki paid Khasi, Jaintia bad Garo namar kata ka daw kumno kin lah ban long dkhot ha kat kane ka Committee. Ngi don ki briew lajong kiba long ki riew shemphang na ki paid Khasi, Jaintia bad Garo bad ngi don ruh ki MLA kumta la dei ban thung da ki IAS, MCS, ki IPS, IFS ki Professor, ki Judge ba la shong thait, ki Advocate kiba la shemphang bha ha ka kam bad ter ter. Namar kine ki dei kiba tip bniah bad sngewthuh shaphang ka jinglong ki jaidbynriew Khasi, Jaintia bad Garo” ong u ban Banteidor.
U la ong shuh shuh kiba nabar kin ym sngewthuh bad lada ki wan mushlia bad tuklar kan buh ïa ka jylla ha ka jingma kaba khraw bad ym tip aiu kan jia lada jia ba kine ki trai shnong Khasi, Jaintia bad Garo kim hun ïa kata ka jingpynkylla ïa kata ka Reservation Policy. Ki briew la jong ki sngewthuh kaei ka ban jia shwa ba kin leh bad kin ym leh kulmar katba kiwei ki jaidbynriew kin ym sngewthuh bad kin ym don jingkitkhlieh hi ruh lada jia kumno kumno ruh bad kane keiñ ka long kaba ma. “ Kumta ngin aym ailad ban wan tuklar da ki briew kiba namar hynrei ngin dawa ban thung beit tang da ki jong la jong kata napdeng ki Khasi, Jaintia bad Garo ha katei ka Expert Committee bad ki Riew Saiñ Pyrthei ba la ih bad ïar ka bor jingmut jingpyrkhat ruh ki dei ban don bynta lang ha kane ka Committee” ong biang u bah Banteidor.