Shillong, Nailar 22 : Ka nongai ktien jong ka sorkar MDA, ka Kong Ampareen Lyngdoh ha ka sngi Ba-ar ka la ong ba ka sorkar jylla ka buh ka thong ba kan leh da kaba tyngeh ïa ki kam pyntriem ha ka jylla.
“Ngin sa leh da kaba tyngeh haba ïadei bad kino kino ki kam ha ka jylla Meghalaya. Ngin ym ailad satia bad ngin syllad beit naphang (ïa ki kam pyntriem),” ka la ong haba kren bad ki lad pathai khubor haba ïadei bad ka jingïohkem ïa ki 11 ngut ki dkhot jong ka kynhun lehnoh ba dang thymmai, ka National Liberation Council of Nongkyndong (NLCN).
Da kaba ïaroh ïa ki pulit ka jylla kiba la ïoh ban pynpra ïa katei ka kynhun, katei ka Myntri ka la ong ruh, “Nga ai ka jingïaroh ïa ki pulit kiba la leh ïa kaba dei eh bad kane ka jingkem ïa ki ka long ruh ka khubor sha kiwei ba ngin ong em ïa ki kam pyntriem. Kumba ngi la ong mynshwa, ngi ong em ïa ki kam pyntriem.”
Halor ka jingkylli la ki kam pyntriem ki dei ki dak jong ka jingbym ïohkam ïohjam bad ka jingduk ha ka jylla, ka Myntri ka la kyrngah bad ong ba ym lah satia ban shu pynïasoh jubor kumta namarba ka jingduk hi kadei ka jingeh kaba ka ri baroh kawei ka kynduh.
Ka la ong ruh ba tang namar bym don ïohkam ïohjam kam mut shuh pat ban phaikhmat noh sha ka kam kiengatiar.
“Kumta, katkum ka jingtip jongnga bad katkum ka jingkren da u Myntri Rangbah ka jylla, ngi na ka sorkar ngin leh da kaba tyngeh ïa kane bad ngin pyntikna ba kino kino ki kam ha kano kano ka dur kin ym ïohlad,” ka la ong da kaba bynrap ba ym dei satia ban shu aidaw bym donkam donjam hynrei kadei namar ki don kiwei pat ki daw.
“Kumta, ngam pdiang ba ka jingkyrduh kam kadei ka daw hynrei nga ong ba kum ka Ri kaba la kiew hapdeng shibun ki jingeh, ka jylla kaba la ïohi ïa kitei ki jingeh ka hap ban mih shakhmat bad ka sorkar jongngi ka la leh kumta.”
Ha kajuh ka por, ka Kong Ampareen kaba bat ruh ïa ka tnad ka Rep ka Riang ka la ong ruh ba kane ka sorkar jylla ka la shim ruh ki sienjam ban thaw ki lad aikam aijam da kaba phai sha ka kam rep bad kumno ban pynïasoh ïa ki khnang ba kan long ka jingaikam aijam ïa ki nongshong shnong.
