Nongstoiñ, Nailar 14: Na ka bynta ban pynsngewthuh sha ki paitbah ïa ka jingkordor jong ka jingkoit jingkhiah, ka ophis jong ka District Medial & Health Officer ha ryngkat ka jingïatreilang jong ka ophis u Deputy Commissioner, Program Officer ICDS bad ka District Social Welfare West Khasi Hills, mynta ka sngi palei ka 14 tarik Nailar ka la pynlong ïa ka Integrated Health Camp ha Ri Khasi free Morning School Tiehsaw.
Katei ka Health Camp ka dei ruh kaba nyngkong eh hapoh ka jylla, ba ka sorkar ka la sdang na ka bynta ban pynshai bad pynsngewthuh sha ki paitbah kumno ban ñiewkor ïa ka jingkoit jingkhiah da kaba pynïajan bha bad ki Doktor kiba trei ha ki PHC, CHC kiba don ha kylleng ki jaka bad ruh bad ki doctor kiba don ha Civil Hospital, khnang ba kin ïoh jingtip ha kaba ïadei bad ka jingkoit jingkhiah jong ki.
Ha katei ka sngi ka ophis jong ka DM&HO ka la wanrah ïa ki Doktor Specialist kiba dei ban peit bad sumar ïa ki jait jingpang bapher bapher, ha kaba ki la poi naduh dang step ban pyndep ïa la ka jong ka kamram kumba ka sorkar ka la pynbeit.
Naduh ba ki Doktor ki la wan poi ki paitbah ba kynthup ïa ki khunlung, khynnah bad ki longkmie naduh kiba ar met, kata kiba sngew shitom bad ki bym sngew shitom ki la ïa tuid ban leit phah check bad phah test ïa ka jingkoit jingkhiah jong ki.
Nalor kata ka la don ruh ka Blood donation lane ka jingai sngewbha ïa ka snam, na ka bynta ban buh ha ka blood bank ha Civil Hospital, ban ïarap ïa kito ki ba pang ba shitom kiba don kam snam kyrkieh.
La pynlong ruh ïa ka jingïalang ha kaba la pynïaid da u Doktor W Sutnga bad la ïoh ïa ka jingpynshai na u Doktor R.Marweiñ, halor ki mat ba ki paitbah kin sngewthuh ba ka jingïada lypa ka kham kordor ban ïa ka jingpynkoit.
Ha kajuh ka por la ïoh ruh ïa ka jingkren na u bah Garod L.S.N. Dykes Deputy Commissioner ka West Khasi Hills, bah Gabriel Wahlang MLA ka Nongstoiñ constituency u ba long u symbud kongsan.
Kiwei pat ki heh sorkar kiba la ïashim bynta ha kaba ai jingpynshai halor ka jingkoit jingkhiah, ki long u Dr W.B Langstieh Project Director ka Meghalaya AIDS Controll Society, Dr. Mrs N.Kharsohnoh Director of Health Service MCH& FW bad Dr Mrs Meribha K.Sohliya DM&HO West Khasi Hills.
Ka Dr.M.Ampareen Lyngdoh Myntri ka tnad ka koit ka khiah kaba long ka kongsan, ka la ong ba ha shuwa ban wan sha Nongstoiñ ka la leit ban plie ïa ki lai tylli ki Sub Health centre ha Mawthadraishan bad ka jingwan jong ka sha Nongstoiñ, kam dei tang ban pyndep ïa ka program, hynrei ban ïoh jingtip ïa ka jinglong jingman jong ki paitbah ha ka jingkoit jingkhiah jong ki bad ban pynsngew sha ka sorkar, ba kan kham pynbha shuh shuh ïa ki lad ai jingsumar hapoh ka District.
Ha kajuh ka por ka la pynshai ruh ba katkum ki jingtip ba ka sorkar ka la ïoh ban lum, ka long ba ha kine ki snem ka jingpang AIDS ka la kiew haduh katta katta hapoh ka jylla. Ka la kyntu ruh ïa ki nongshong shnong ba lada ki don tip ba ki don kiba ïoh jingpang AIDS ha ki shnong ki thaw kim dei ban ibeiñ.
Ha kajuh ka sngi ka Dr Ampareen Lyngdoh ka la leit ban plie ruh sa ïa ka Sub Health Centre ha ka shnong Sohparu.
