Nongstoiñ, Jymmang, 15: Ha ka jingbuddien jong u nongthoh khubor, la lap ba ki dang don da ki spah tylli ki shnong khamtam eh ha ki jaka nongkyndong, ki bym pat ïoh satia ïa ka um bam um dih kaba biang ha West Khasi Hills baroh kawei.
Ka jingbym don ïa ka um bam um dih kaba biang na ka tnad PHE, ka la pynlong ïa ki paidbah nongshong shnong ba kin ïakynduh shibun ki jingeh, khamtam eh ha ka por tlang namar bun ki pung tong um ki rit bad don ruh kiba la rngad lut.
Halor kane ka bynta, bun ki nongsynshar shnong bad ki paidbah ki la pynpaw ïa ka jingsngewkhia kaba khraw namar ki jingeh ba bun. Don ruh kiba la ong ba ka jingkyntu ka sorkar ïa baroh ki shnong ban leh khuid bad ba kawei pa kawei ka longïing ka dei ban don ïa ki paiñkhana ba biang, kam don jingmut satia namar haba la shna ïa ki paiñkhana ki donkam ruh sa ïa ka um kaba biang pahuh pahai. Hynrei haba ym don um, ki shem jingeh haduh katta katta.
Nalorkata la lap ruh ba ki don shibun ki shnong wat la ki la don ïa ki pipe line, hynrei ka um pat ka duna namar ka jingbym biang jong ki jaka ba den ïa ki tyllong um. Toi kumba long mynta ka Jal Jeevan Mission ka la treikam shait shait, hynrei dang bun hi ki shnong ki bym iohi pipe um satia.
U Bah S.Nongbri uwei na ki nongïalam shnong ha West Khasi Hills u la ong, “Ngi tip ba ka sorkar pdeng ka la buh ïa ka thong ba baroh ki shnong la ha sor ne kyndong, ki dei ban ïoh ïa ka um kaba biang haman la kawei pa kawei ka thliew ïing”.
“Ka la dep bthah ruh ïa ka sorkar jylla ba ka dei ban phah ïa ki jingai jingmut bad ïa ka jingdon jong ki shnong, ki longïing bad ka jingbun briew ha ka jylla, khnang ba ka sorkar pdeng kan mang pisa na ka bynta ban pynïoh um ha kawei pa kawei ka thliew ïing. Hynrei ka sorkar jylla haduh mynta imat kam pat leh ïa kata”.
Ym lah ruh ban len ba wat la ki tyllong um ki dei kiba kongsan, hynrei ki paidbah haduh mynta kim pat nang satia ban ñiewkor lane ban tyngkai da kaba pynneh pynsah ïa ki khlaw kiba dei ka bynta ba kongsan ban ïada na ka jingrngat jong ki tyllong um. Ka jingpom pathar ïa ki khlaw ki btap, ka dei ka dawbah kaba wanrah ïa ka jingtyrkhong jong ka khyndew, kumta ka wanrah ka jingkyrduh um.
