Kynnoh ba pynjot ki Sordar Shnong ïa ka jaka rep jong ka longïing ha Umwali

0

Nongstoiñ, Jymmang 15: La kynnoh ba ki nongsynshar shnong ka shnong Umwali kaba don ha ki thaiñ Langpih, kata u bah Teiborlin Nonglang sordar jong katei ka shnong ryngkat u Phiborlin Syiemïong sordar barim ki la ïalam ïa ka kynhun jong ki ryngkat kawei ka puh shilum sha ka jaka rep jong ka kong Sngewbhalin Paliar, kaba ki la rep la riang ha katei ka jaka la bun snem bad ki la pynpra lut ïa ki tynrai synsar ba la thung ha katei ka jaka.
Ka kong Sngewbhalin Paliar haba pyntip ha u nongthoh khubor ka la ong ba kam shym poi pyrkhat ba kaba kum katei ka jingjia ka wan hap ha ka ïing ka sem jong ka ba da ki nongsynshar shnong kin leh ïa katei ka kam ka bym lah ban pdiang ha ka imlang sahlang.
Ka la ong ruh ba mar synïoh jingtip ba ka kynhun ba la ïalam da u sordar, ka la leit ban pynjot pynpra ïa ki jingthung jingtep ha katei ka jaka rep, ma ka bad u kurim ryngkat ki katto katne ngut ki para shnong ki la leit peit, hynrei haba ki la poi ha katei ka jaka rep, u sordar ryngkat ka kynhun jong u ki la sei da ki tiar pynmynsaw bad byrngem byrsit ïa ki haduh ba ki la khynñiuh bad kti bad kjat wat la katta ruh ki la pyneh mynsiem jubor da kaba kheiñ duh ba kin ym shah ba kin shu thombor ïa ka hok jong ki.
Nalor kata ka la ïathuh ruh ba ha kine ki taïew ba la dep, ka la don ka jingpynjot pynpra ïa ki tynrai synsar ba dang shu dep thung hynrei ki la leit ban thung biang. Ka la ong ruh ba hadien shi sngi ar sngi haba ki la leit biang sha katei ka jaka rep, ki tynrai synsar ki la shah pynpra biang bad kim don shuh ym tip ki la leit bret sha ei.
Katei ka longkmie ka la ong ruh ba ha ki snem ba la dep ka la don ka jingwan thombor jong ki pulit Assam ïa ka jaka rep jong ki, ha kaba ki la mut ban wan buh jubor ïa ka ktem pulit. Hynrei ka la ïeng skhem beit triang khlem aili haduh ba ki pulit Assam ki la hap ban phet ïam rem na katei ka jaka.
Hynrei mynta sa da ki para shnong, ki paradoh para snam bad don ruh wat kiba haïing hasem kiba la ïasylla lang ban pynjot pynpra ïa ka jaka rep bad ïa ki jingthung jingtep jong ki khlem kano kano ka daw. Katei ka jingleh ka la pyn suhsat khait bad pynpait dohnud ïa ka ïng ka sem baroh kawei.
Ka la ong ruh ba lada kitei ki rangbah shnong bad ka kynhun jong ki, ki don kano kano ka jingbym sngew tynnad, ki dei ban beh noh syndon napoh shnong. Tang ba lada ki beh ruh ki hap ban pynbiang da ki jingthoh jingtar bad kin pynïoh ruh ïa ki jaka rep jaka riang, ki kper ki phrah kumba ka long ha katei ka shnong bad lada ki la lah ban leh kumta kin kohnguh beit.

Leave A Reply

Your email address will not be published.