Da ki kulai, pung khwai bad ki lieng buh da DSRGR ha Lumdiengwah ban khring nongwan kai

Shillong, Nohprah 18 : Ban khring ïa ki nongwan kai khamtam eh ïa kito kiba wan shiing shisem bad ruh kiba wan shi paralok, ki nongpynïaid jong ka Dwet Singh Rymbai Green Resort (DSRGR) ha ka sngi Saitjaiñ ki la plie paidbah ïa katei ka jaka shangkai pyngad ha ka shnong Laitdiengwah, Smit.
Ïa kane ka resort la plie da u Syiem ka Hima Mylliem, Paiem Ainam Manik Syiem ryngkat ka jingdonlang kiwei pat ki Myntri ka Hima Mylliem ryngkat u trai jong katei ka resort Bah Kordor Marbaniang bad ruh u Bah SS Sohtun nalor u Sordar ka thain, ki nongïalam shnong bad ki bahaiing hasem.
Ha katei ka jaka jngohkai, la buh lut ïa ki jaka pynbyrngia na bynta ki khynnah, nangta ka madan phutbol rit ïa ki samla, ka jaka khwai ïa ki rangbah nalor ki iing sah ba la shna ha ki ranab diengkseh
Kaba kham khring eh ïa ki nongwan ha katei ka sngi dei ka jingbuh ïa u kulai ha kaba ki khynnah rit ki ïa lum ban peit bad ïalehkai bad u.
U Bah SS Sohtun uba peit ïa katei ka jaka, u la ïathuh ba ka jingai kyrteng Dwet Sing Rymbai ka dei ban kynmaw ieit bad pynneh pynsah ïa ka kyrteng jong u Paieid uba la khlad noh uba thrang ban ïohi ba ha katei ka jaka ba heh 300 akar kan ieng ka jaka shangkai pyngad.
U Bah SS Sohtun u la ïathuh ruh ba ki la buh ruh ïa ka dukan kaban pynbiang ïa ka bam ka dih na ka bynta ki nongwan kai. Katkum ka jingïathuh jong u, ki bam ba shet hangtei kin dei beit tang kiba mih na katei ka thain hi ym kiba wanrah na shabar.
Na ka liang u trai pat, Bah Kordor u la ïathuh ba mynta ki la pynkhreh ban pyndep sa ïa ka nan ban jngi kaba ki buh ban sdang ban pyndep noh ha u snem ban wan. U la ïathuh ruh ba katei ka jingpynkhreh jong ki kadei kaba la ïaid da ki phew snem kumno ban pynwandur ïa ka nan ban ïoh buh ïa ki lieng na bynta kito kiba kwah ban shongkai hapdeng um, nangta ban shna ïa ka pung khwai bad ruh ïa ki iing sah pyngad.