Da ki hajar tuid ki riewngeit ka Balang Katholik sha ka Procession Eucharist ha Nongpoh Parish

Nongpoh Rymphang, 24: Da ki hajar ngut ki paid riewngeit ka Balang Catholic na ki lai tylli ki Sub District ha ka sngi U Blei ki la tuid sha ka ïingmane jong ka Assumption Catholic Church Nongpoh Parish, ban ïashim bynta ha ka Procession Eucharist da ka jingriewblei.
Ha ka por mynstep la sdang ïa kane ka sngi da ka Mass Bakhuid ha kaba u Fr. Jose Varickasseril u la pynbynta ïa ka kñia ka khriam ryngkat ka jingsakhi lang u Parish Priest jong ka Nongpoh Parish u Fr. Peter Syiemlieh, u Fr. Sawlus Kharpran, kiwei kiwei ki Lyngdoh Sohblei bad ki Sister ha ryngkat ki nongïalam niam na ki Balang Shnong bapher bapher jong kane ka Parish.
Nalor ka jingsam ïa ka ktien jong u Blei sha ki paid riewngeit ha ka Mass Bakhuid, ki paid riewngeit ki la shim bynta ruh ha kaba ïabam ïasip ïa ka met bad ka snam jong U Trai Jisu Khrist bad ki don ruh sa 69 ngut ki khynnah shynrang bad kynthei kiba la ïoh pdiang ïa ka Communion Bakhuid ha ka sien banyngkong eh ha ka jingim jong ki.
Ha ka por noh phai sngi la pynlong sa ka Procession Eucharist ba la sdang na phyllaw ïingmane bad la ïaid ha shilynter jong ka surok Nongpoh da ki jingrwai kaba iphuh iphieng bad kaba shongkun shongblei bad la pynkut biang ha phyllaw ingmane jong ka Nongpoh Parish.
La pynkut ïa ka jinglehniam da ka jingmane ïa ka Sakrament Bakhuidtam ka Duwan ha kaba u Fr. Jefrey Khongsni u la sam ïa ka ktien jong U Blei sha ki hajar ngut ki paid riewngeit.