Shillong, Rymphang 24: Ki Pulit ka East Khasi Hills ki la ïoh ban kem ïa 5 ngut ki nongtuh thuk thuk bad la ioh kurup ruh ia artylli ki thuk thuk bad kawei ka scooty.
Halor kane u Superintendent of Police ka East Khasi Hills Bah Vivek Syiem u ïathuh ba ki Pulit ha ka jingbuddien ïa kawei ka kynhun ki nongtuh kali arshaka la katto katne taïew, ki Pulit Special Cell bad ka Sohra Police Station ki la ïoh ban bat ïa arngut ki nongtuh thuk thuk ha ka mied lah sngi U Blei ha Sohra Rim bad ïoh kurup ïa ka Suzuki Gixer Bike ML05-AD-4393 kaba tuh na Smit.
Ki pulit ki ïathuh ba kine ki arngut ki nongtuh ki kyrteng u Babu Marak ba 19 snem na Dalia Shella bad u Sunday N Sangma ba 30 snem ba na Samanda, East Garo Hills. Ïa kane ka thuk thuk la thmu ban die sha ki briew na Bangladesh.
U Bah Vivek u ïathuh ba kine ki nongtuh ki la shimti ïa kane ka thuk thuk ha Mawkdok na kawei pat ka kynhun Nongtuh, kiba donti ban rong tuh ïa ki thuk thuk bad scooty na kylleng ki jaka ka Nongbah Shillong.
U ong ba ha ka jingbuddien bad jingkhynra, ki Pulit Special Cell kila ïoh ban kem biang sa 3 ngut ki nongtuh kiba donkti ha kiba bun ki kam tuh thuk thuk. Ïa kine ki briew la kem na kawei ka scooty ha ka thaiñ 7mer, Upper Shillong.
U la ïathuh ba kine ki 3 ngut ki kyrteng u Barabor Namsaw ba 28 snem na Jirang, u Banroilang Iawrod ba 19 snem na Kynbahmalai, Phlangwanbroi, Mawsynram bad u Declin Warjri ba 20 snem na Nongmensong, Shillong.
Ha ka jingbteng ban talasi kali ha Sohra, ki pulit kila ïoh ban bat biang sa ïa kawei ka thuk thuk ba shah tuh ha ka step sngi U Blei na Mawïong Umjapung kaba don u nombar R15 ML05AA 3297. Ki nongtuh ki la pynïeng ïa kane ka thuk thuk shaneng jong ka jaka talasi ha Nongsawlia bad kila phet krad na kane ka jaka haba ieh shadien ïa kane ka thuk thuk.
Ïa kine ki nongtuh la ïalam tian bishar hapoh ka case ka Madanrting Police Station hapoh ka kyndon 303 (2) BNS.
