Shillong, Jymmang 25: Da ki hajar hajar ngut ki paidbah na kylleng ki jaka ka Ri Khasi Jaiñtia, ki la ïatuid ban leit ai khublei bad ai mynsiem ïa u Bah Ardent mynta ka sngi ha ka jaka ba u shah thngan hajan Additional Secretariat.
Kiba bun kiba wan katba ki dang ap ban ïoh khublei ïa u Bah Ardent, ki la ïa pynlong jingduwai bad bun ruh kiba la ïa ïam pangnud namar kane ka jingshah shitom u President ka VPP.
Kane ka jingïakhih shong shah thngan u Bah Ardent kaba u la sdang naduh ka sngi ba-ar ka la jam sha ka sngi kaba lai ha ka sngi Palei ban dawa na ka sorkar jylla ba ka dei ban pynbeit thymmai ïa ka Reservation Policy.
Kane ka jingshah thngan u Bah Ardent la ïohi ba katba nangmih ki sngi ka la nang ïoh jingkyrshan kaba nang khlaiñ nangkhlaiñ na ki paidbah bad ïa kane la ïohi ba ha ka sngi ba nyngkong eh u la shong shah thngan ha lynti ïaid kjat kaba don ha pyrshah ka Secretariat hynrei namar ka jingtur ki paidbah ban wan ai mynsiem sha kane ka jingïakhih u la hap ban kynriah noh ha jaka ieng kali ha Additional Secretariat.
Lah ban sakhi ba kiba bun ki longkmie bad wat ki longkpa bad ki samla shynrang bad kynthei ki la jaw ummat haba ïohi ba u Bah Ardent u bteng beit ka jingshah thngan na bynta kane ka mat.
Ka jingjaw ummat kiba wan ban ai jingkyrshan la ïohi ba nalor ka ummat sngewsynei ki tuid ruh ki ummat sngewkmen ha ka por ba u General secretary ka party ha ka por janmiet haba u pynbna ba u Bah Ardent u koit u khlaiñ hynrei namar ka jingthait ka met u hap ban shong jahthait shipor bad la ïohi ba marsien ïohsngew ïa kane ka khubor ym tang ba ki jaw ummat jingkem hynrei ki la thap kti shai bad ki don ruh kiba la pyrta “Amen Amen kan long ka burom jong u Blei,”.
Ka jingnang bun kiba wan ban ai jingkyrshan lah ban ïohi ïa ka dara ba la pynieng la nang hap ban pynheh shuh na kaba ki la pynheh ha ka sngi Balang. Lah ban sakhi ba ym shuh tang ki longkmie longkpa kiba wan ban ai jingkyrshan sha kane ka jingïakhih hynrei ki samla bad wat ki khunlung khynnah ruh.
Ha ka sngi kaba lai jong ka jingïakhih la ïohi ba ym tang ki riewpaidbah kiba wan ban kyrshan hynrei wat ki riewpaw khmat ruh ki la wan ban ai jingkyrshan ïa kane ka jingïakhih u Bah Ardent kata ba kynthup ïa u General Secretary ka UDP u Dr Jemino Mawthoh, u nongtreimnon sngewbha bad u nongthoh kit ka jylla u Dr HH Mohrmen, u MDC ka Nongthymmai u bah Latiplang Kharkongngor, u Bah Amaizing Kurbah, u Bah Baningstar Kharpor, ki nongïalam ki seng bhalang ba kynthup ïa ka HITO, HNYM, HANM, UHM, ka synjuk ki nongniah taxi sor bad khap sor, ki nongshong ïew bad kiba bun kiba ym lah jer shuh.
Haba ïakren bad ki ki la pynpaw beit ïa kawei ka sur ba ka jingwan ai mynsiem ka dei beit namar ka jingdawa ka VPP bad u President ba shong shah thngan ka long kaba shongnia shong aiñ.
Haba ïakren bad ki katto katne ki longkmie kiba wan kyrshan ryngkat ki khun ki kti ba dang rit ki la ïathuh ba ka daw hi ka dei ba ka mynsiem ba kin shong ha ïing kam shah shuh.
“Nga tang shu shim pliang ban bam ja nga poi kynmaw ïa i Bah Ardent bad jaw ummat beit bad ngam lah shuh ban shu shong ha ïing hynrei nga hap ban wan peit ïa i Bah Ardent ryngkat i khun ba dang sawbnai bad ba 4 snem namar ym don ba peit ïa ki,” ong kawei ka longkmie na Umpling haba kren bad u Mawphor.
Shuh shuh la ïohi ba ka jingïoh jingkyrshan u Bah Ardent wat na ki khunlung khynnah la ïohi na ki jingai sngewbha kaba ki wanrah sha kane ka jingwan jngoh jong ki da ki dur kaba ki dro, ki jingthoh kaba ki thoh bad wat ki kot kiba ki sngewtynnad eh ban pule.
“Ki khun baroh laingut naduh ba sdang ka jingshah thngan i Bah Ardent tang shupoi ha ïing na skul ki kren beit tang shaphang jong i bad ki dro ki jingdro ban ai sngewbha bad ki pynbor naduh ka sngi kaba nyngkong ban wan jngoh,” ong kawei ka longkmie ba wanïalam ïa ki lainguit ki khun ba dang hapoh 12 snem.
Ka jingieid bad ka jingkyrshan ki paidbah ïa u Bah Ardent la ïoh ruh ba ha ka por ba u dang shongthait ki la pynlong ka jingduwai ïasaid na bynta jong u.
