Nongpoh, Jylliew 05: Ka tnad Forest, Byrnihat Range lem bad ka shnong Baridua ha Ri-Bhoi ryngkat ka jingïatreilang bad ka Mrket Agar Wood Industries, mynta ka sngi kala pynlong da ka jingthung ïaki dieng Agar, u wei naki jait dieng ba rem dor bala ju pyndonkam ban shna ïaki jait jingsma iwbih bapher bapher haka sngi ba shi tyllup ka pyrthei ki rakhe ïa ka World Environment Day.
Ïa kitei ki dieng la thung haki sawdong sawkun jong ka shnong 9 mer Baridua kaba dei kawei naki shnong kaba don ha syndah bad ka Assam, bad ka jingshit bad ka jingkhluid ka lyer ha katei ka thaiñ kala long kaba palat namar ka jingpom pathar ïaki dieng ki siej ka jingkhlong maw bad tih khyndew tang namar ka jingkamai jongno re jongno.
Naka liang u Bah Freddy Passah u ba dei u Ranger Forest Officer ka Byrnihat Range bad u Bah Pynshailang Basaiamoit B.O ka tnad forest ki la pynshai sha ki nong shong shnong ïaka jing kordor jong ka um bad ki dieng ki siej naka bynta ban ioh ring mynsiem ïaka lyer ba khuid bad ki la pynshai ruh ba kumno ki plastic ki wanrah jingma ïaki briew ïaki mrad bad ka mei mariang namar ka jing bret pathar jong ngi ki briew ïaki plastic ha ki lum ki wah kaba wanrah bun ki jait jing pang bad ka jingpynjot mariang bala pynlong ïa kane ka pyrthei ban dang khluid katba dang mih ki sngi.
Na ka liang u MLA ka Jirang Constituency Bah Sosthenos Sohtun u ba long ruh kum u kongsan hakane ka sngi u la ong ba man la u snem ngi thung ïaki dieng haka sngi rakhe ïaka World Environment Day ha man la ki shnong hynrei shaei ki jah kito ki dieng ka daw ka long ngi shu thung ïaki dieng khlem peit khlem khmih bad khlem sumar bad la shu thung tang ban pyndep rukom ban ioh rakhe ïakatei ka sngi hynrei naka liang u Bah Sohtun u la khot bad wer ïaki paidbah ban thung ïaki dieng bad ruh ban sumar bad ai um ïaki khnang ba kin heh ki san haka rukom kaba dei kumba ki paidbah ki khmih lynti ba lyngba ka jingthung dieng kan wanrah ïaka jingjyrngam ïaka mei mariang kaba la sdang syllen katba dang mih ki sngi namar ka jingkhwan myntoi.
Hakane ka sngi la ïa don ryngkat lang da u rangbah Shnong ka Baridua u Bah Augustine Nongrum, u Syed Abdul Quavi naka MAW Industries, ki seng samla shnong, ki long kmie bad ki nongtrei na ka tnad forest.
