Shillong, Naitung 27: Ka Sorkar ka la ai ei ïa ka LPG sha ki longkmie kiba dei na ki longïing ba duna ka ïoh ka kot hapoh ka Pradhan Mantri Ujjwala Yojana (PMUY).
Shuh shuh, la ai ïa ka subsidy kaba T. 300 man ka 14.2 kilo ka tyndong shet jingshet (bad katkum ba ïahab na ka bynta ki tyndong shet jingshet ba 5 kg) haduh 12 sien pyndap biang kaba 14.2 kilo kaba ïaryngkat bad ka tyndong shet jingshet ba la ai sha baroh ki nongpyndonkam ïa ka PMUY.
Shuh shuh ki sorkar jylla ki la ai ïa ka subsidy na ka bynta ka jingpyndap biang ïa ki tyndong lane kiwei kiwei ki subsidy ïa ki nongïoh jingmyntoi jong ka PMUY.
Haduh ka 01.07.2024, palat 30.19 klur ki nongpyndonkam LPG ki la pynrung kyrteng hapoh ka skhim PAHAL. Hapoh ka Skhim PAHAL, la die ïa ki tyndong shet jingshet ha ka dor bym ïoh subsidy bad ïa ka subsidy kaba kiba pyndonkam LPG ki dei ban ïoh la phah beit beit sha ka bank account jong ki. Ïa ka subsidy la phah ha ka rukom Aadhaar Transfer Complaint (ATC) lane ka Bank Transfer Complaint (BTC).
Ka long kaba donkam ban pynthikna ba kine ki jingmyntoi ki poi sha ki nongïoh jingmyntoi kiba dei hok ha ka por kaba biang. Ka jingpynshisha katkum ka Aadhaar na ka bynta ki skhim Direct Benefit Transfer (DBT) ka ïarap ha ka jingbeit.
Ka jingwad ha ka rukom kaba jemdor bad kaba mardor, ka jingpynshisha bad ka jingweng ïa ki jingmih kyrteng arsien jong kiba dei ban ïoh jingmyntoi khnang ban ïaid beit ki jingpynpoi ki jingmyntoi sha kito kiba dei ban ïoh ïa kine.
Ban pynïar ïa ka jingshisha ki nongpyndonkam, ka sorkar ha u Risaw 2023 ka la pynmih ïa ki jingbthah sha ki Oil Marketing Company (OMC) ban sdang ïa ka jingpynshisha katkum ka Biometric Aadhaar kaba pura ïa ki nongïoh jingmyntoi jong ka PMUY bad PAHAL.
Ki briew ki lah ban pyndep ïa ka jingpynshisha katkum ka Aadhaar jong ki lyngba ki rukom bapher bapher. Kane ka kynthup ka jingpyndonkam ïa ki mobile application ba la pynbiang da ki OMC jong ki.
Kane ka lad ka pynsuk, ka ïarap ïa ki briew ban pyndep ïa ka kam ban pynshisha da kaba pyndonkam ïa ki smart phone jong ki, khlem da donkam ban leit ïakynduh ïa u nongpynbiang tyndong shet jingshet ha ka rukom kaba suk bha ïa ki.
Ki briew ki lah ruh ban pyndep ïa ka jingpynshisha katkum ka Aadhaar ha ka por ba pynpoi ïa u tyndong shet jingshet jong ki. Kane ka rukom ka ïarap ruh ïa ki briew ban pyndep ïa ka kam khlem da donkam ban leit sha kano kano ka jaka.
Ki briew ki lah ruh ban pyndep ïa ka kam pynshisha da kaba leit sha ka jaka treikam jong u nongpynbiang tyndong shet jingshet kaba ai kawei pat ka lad ïa kito ki bym don ha ka por ba pynpoi ïa ki tyndong shet jingshet lane kiba kwah ban leit hi dalade ban pyndep ïa ka kam.
La pynshlur ïa baroh ki nongpyndonkam LPG ban pyndep noh ïa ka jingpynshisha katkum ka aadhaar da kaba pyndonkam ïa kano kano ka rukom ha la ka jingsuk jong ki.
Kane ka rukom treikam kaba laitluid ka pynthikna ba ki briew ki lah ban jied ïa kano kano ka rukom bad ka por katkum ka jingbit jingbiang jong ki. La pynlong ïa ka jingpynshisha ïa ka Biometric Aadhaar (palat 35 lak ki nongïoh jingmyntoi jong ka PMUY) ha ki Viksit Bharat SankalpYatra camp.
La sdang ïa ki kam ban pynshisha ïa ki Aadhaar ha ki tyngkong ïing jong ki briew kum shi bynta ki jingjurip ïa ka jingshngaiñ bad ki jaka kaba dang ïaid mynta ruh. Ym shym la pynsangeh ïa ka jingshakri lane ka jingmyntoi jong ki briew ki bym shym la pyndep ïa ki jingshisha biometric jong ki.
Ïa kane ka jingtip la ai da u myntri khynneh ka tnad Petroleum bad Natural u Suresh Gopi, ha ka jubab kaba shu thoh ha Lok Sabha.
