Da ka spong ka phali la pynskhem u Paiem Hima 12-Lyngdoh ïa u Rangbah Shnong ba pura ka Harlibagan

0

Nongpoh, Risaw 26: Ban pynïaid beit ïa ka synshar ka Khadar bad katkum ki riti ki durtur ba la buh da ki longshuwa ki manshuwa, ka Hima Khad-ar Lyngdoh mynta ka sngi ka lah ban pynskhem noh ïa u Rangbah Shnong ka Shnong Harlibagan kum u Rangbah Shnoing ba pura kaba dei hadien ba la jied da ki paidbah nongshong shnong ka Harlibagan ba hap ha ka Raid Nongkyrla ha ka Hima Khad-ar Lyngdoh ha Ri Bhoi District.
Kum ban pynkynmaw, ki paidbah nongshong shnong ka Shnong Harlibagan ha ka 15 tarirk mynta u bnai ki la jied thymmai ïa u Rangbah Shnong hadien ba la kut noh ka samoi treikam bad ban pynskhem ïa u kum u Rangbah Shnong ba pura katei ka shnong la wan ban pynskhem da u Paiem ka Hima Khad-ar Lyngdoh ryngkat ka spong ka phali kaba dei katkum ka rti ka dustur. Une u Rangbah Shnong ka Harlibagan ba la pynskhem mynta ka sngi ha ka jingïalang kaba la long ha ïing Dorbar Hall ka Harlibagan u dei u Bah Sisten Nongrum bad la pynskhem bad ai ïa ka spong ka phali ruh ha ryngkat ka jingdon lang u Lyngdoh ka Raid Nongkyrla, u Bah Phrangsngi Syngkli, u Bah William Mynsong, u Myntri Namsaw, u Bah H. Namsaw, ki rangbah bad kynthup ki paidbah nongshong shnong ka Shnong Harlibagan.
U Paiem ka Hima Khad-ar Lyngdoh, u Paiem Wanphang Syiem Nongshai ha kane ka sngi u la shim ïa ka bynta ban pynspong ïa ka spong ka phali, kaba dei shi bynta ka riti ka durtur bad kane ka jingpynskhem lyngba ka spong ka phali ryngkat ka sanat ka long ban pynbna ba u Bah Sisten Nongrum u la dei u Rangbah Shnong ba pura ka Shnong Harlibagan ba la jied ki paidbah Nongshong shnong.Na ka liang u paiem, Wanphrang Syiem u la kyntu ruh ïa ki paidbah nongshong shnong ka Harlibagan ba ki dei ban ai ka jingïatrei lang ym tang ban pynneh pynsah ïa ka riti ka dustur bad ka khyndew ka shyiap, hynrei ki dei ruh ban ai ka jingïatrei lang na ka bynta ban wan rah ïa ka shongsuk shongsain bad ka roi ka par hapoh ka shnong ka thaw khnang ba ki khun ki hajar kin dang kiew arted ha ka jingim na ka por sha ka por.
U la khot la wer ruh ba ki dei ruh ban ai ka jingïatrei lang bad ka Raid bad ka Hima ha ryngkat ka shnong namar haba don ka jingïatrei lang kin wan shibun ki jingkylla la ka long ha ka shongsuk shongsain bad ha ka roi ka par ba ki paidbah ki donkam hapoh katei ka shnong kaba la ioh mynta ïa u rangbah shnong ba pura, u la bynrap.

Leave A Reply

Your email address will not be published.