Bun ki khraw pyrkhat kiba kwah shakri paidbah ki kynran dien noh ban ïaleh elekshon : Albert Maring

Nongpoh, Risaw 26: Ka jing long jingman ha ka saiñ hima sima ha ki por mynshwa kala pher shibun bad bun ki jingkylla ki don haba nujor bad kane ka juk ba mynta, ki kyrtong haba ki mih ban ïa leh elekshon ki tyrwa ïalade ha ki paidbah bad kata ka jing tyrwa jong ki, ka long halor ka nongrim ba ki kloi ban shakri ïa ki paidbah ban long ki nongshim bynta ha ka synshar khadar paidbah ban long ki nongmih khmat ki nongthaw aiñ ha iing Dorbar thawaiñ ka jylla, te ha ki por mynshwa ki kyrtong ki wan ban kyrpad sha ki paidbah bad ka jingïalap elekshon kham bunsien ka shait long ha ki sngi iew, namar ha ki por mynshwa ki kyrtong kim da lah ban poi sha man ki shnong ki thaw te ki paidbah ki sngap ki pyn shong nongrim halor ki ñia ki jutang jong ki kyrtong kiba kwah ban ïakhun elekshon.
Hynrei ki kyrtong mynta baroh ki buh ka thong ba baroh dei ban poi sha man ki shnong ki thaw ki kyndong kynshrot sha man la ki thliew iing bad ki paidbah ruh ki khmih lynti ba ki kyrtong ki dei ban poi man la ki thliew iing, kine ki jingïalap elekshon ba ki kyrtong ki sei ki ñia ki jutang khamtam ha ki sngi iew ki la kham duna shi por ki (common platforms) ki long shongshit bha hynrei mynta la kham duna namar ba bun ki kyrtong ki ïaleh ban rung iing. Ki hehspah mynshwa ki kyrshan sngew bha ï uno uno u kyrtong ba ki sngew tynnad ki ïarap pisa na ka bynta ka bai leit bai wan kata kaba ki ki heh spah lane ki businessman ki leh ha ki por mynshwa .
Hynrei ha ka jing ïaid jong ka por kine ki juh ki businessman ki iohi ba kham lah ban ïaleh hi, haba u businessman u wan ban ïaleh election ka mih ka kyntien ba dei ban jop da kano kano ka lad namar ba u wan ïaleh hi ba dei ka election ka kylla sniew namar ba u pynbiej ïa ki paidbah da kaba ai pisa bai bam khana, ai pisa ban pynlong tournament football , ai pisa ïa ki longkmie ban leit shang shuwari bad kumta ter ter.
Suki suki kane ka jingleh jong ki candidates heh spah ne businessman ka pynlong ïa ki nongshong shnong ba dei ban jied ïa u nongmih khmat, ka wan rah ka jingmlien kaba sniew ha ka sngi thep vote ki paidbah kim sngew kwah shuh ban leit thep vote khlem da ioh pisa, kane ka jinglong kaba sniew kaba la hikai da ki heh spah, ha ki por mynshwa ki paidbah ki mih na iing ki rai ban leit thep vote ia u candidate u ba ki mon ki sngew tynnad ym donkam ban ai pisa, hynrei mynta pat bun kiba ieng laiñ ban thep vote ruh ki ap haduh ban da don ba tyrsuh ba ai pisa kane ka dei ka jingmlien kaba sniew kaba ngi la shah hikai kum ki paidbah ngi dei ban sngew thuh.
Haba ngi kren ïa ka pisa ne haba u businessman u wan ban ïaleh elekshon u don kata ka mynsiem kaba ong ba dei ban jop beit da kano kano ka lad, kane ka pynduh nong pat ïa ki paidbah namar ba ki kyrtong ki ba don shisha ka sap ban shakri ïa ki paidbah ban long nongïalam nongmih khmat teng teng kim nud shuh ban ïaleh elekshon tang namar ba ym don pisa, lada baroh ki kyrtong ki ba bha kiba don ka mon ban shakri ban long ki nongmih khmat ki rieh noh ngin sa ioh ki nongmih khmat ki bym da don ïa ka sap ki bym da don ïa ka mon ban shakri ban pynroi pynpar ha ki shnong ki thaw ha ka constituency, hynrei ki long nongmih khmat tang namar ba ki lah ban thied ïa ki paidbah da ka spah jong ki ha ka por election.
Ngi kum ki paidbah ngi dei ban sngew thuh shai ba lada ka jia kumne baroh ki khun samla rangbah kiba don ka sap ban long ki nongmih khmat ban shakri ïa ki paidbah baroh kin sa rieh lut namar ba ym don pisa ban ïaleh election bad kan sa poi ka por ba ïa ka kam nongmih khmat ban shakri ïa ki paidbah kan sa long noh kum ka exclusive club jong ki heh spah businessman, kane ka long kaei kaei kaba sngewsih na ka bynta ka lawei jong jong ki khun ki kti ki pateng ban wan ngi kum ki paidbah ngi dei ban sngew thuh bad hap ban pyrkhat sani bha, kane ka long katkum ka kyrwoh na u Bah Albert Maring na Pahamdumu, Ri-Bhoi District.