Da ka skul ha kyrteng u Tirot Sing yn tei ha North Tripura, u dur mot jong u JJM ha Agartala

Shillong, Nailar 10 : U Chairman jong ka The Indigenous Progressive Regional Alliance kaba la tip ruh kum ka TIPRA Motha, u Pradyot Deb Barman, u la pyntip ba ka Tripura Tribal Areas Autonomous District Council (TTAADC) kan shna ïa ka English Medium School ha North Tripura kaba ki thmu ban ai kyrteng ha u Khlawait ka Jaidbynriew Khasi, u Tirot Sing Syiem.
U la ïathuh ruh ba katei ka jaka kadei kaba bun ki dei ki riewlum khamtam eh ki paid Khasi-Pnar.
La ïathuh ruh ba kin ai jaka ruh ha Agartala kaba dei ka nongbah jong ka Tripura ban shna ïa ka ophis jongki lai tylli ki ADC jong ka Meghalaya nalor u dur mot jong u Rev. JJM Nichols Roy ba dei u Kpa jong ka Khyrnit Ba Hynriew jong ka Riti Synshar jong ka Ri.
Nalorkine, u Pradyot u la pyntip ruh ba la ïa kren ruh ba ka Bodoland Territorial Council kan ai jaka sha baroh shiphew tylli ki autonomous district council ban shna ïa ki kynja Guest House lane ki ophis jong ki Council bapher bapher.
Katba na ka liang u CEM ka KHADC u la pyntip ba ka jingïalang ka la ïakren ruh ba ha kane ka sngi ki la ïakren ba ki don ruh ka jingïakynduh kaba man ka por hapdeng jong ki khamtam eh haba ïadei bad ka jingpynneh ïa ka riti dustur bad ka kolshor.
“Lyngba kane ka jingïakynduh lang ba pyni ïa ka kolshor mar kyllïang kan wanrah ruh ïa ka jingsngew ïajan hapdeng ki Jaidbynriew Riewlum na ki thaiñ bapher bapher jong ka thain shatei lam-mihngi jong ka Ri,” u la ong.