Nongstoiñ, Naiwieng 21: Na ka bynta ban kyntiew ïa ki nongshong shnong kiba don ïa ki sap ba kyrpang, ha ka ban shna ïa ki jait jingshna kiba bun jait bad ki jait tïar kiba lah ban pynïaid ïew, ka Meghalaya Sate Skill Development Society, kawei na ki tnad treikam jong ka Labour Department ba la ïadon bynta lang da ka Skill Acquisition and Knowledge Awareness for Livelihood lem bad ka District Skill Committee, mynta ka sngi ka 21 tarik Naiwieng, ka la pynlong ïa ka prokram ba kyrpang ha TRYSEM Hall DC Ophis Nongstoiñ, ban pynsgewthuh ïa ki nongshong shnong kumno ban thaw ki lad ki lynti na ka bynta ban weng ïa ka jingkyrduh kam.
La pynïaid ïa katei ka prokram da ka kong Memorïal Khongaiñ kaba dei ka Officer jong ka MSSDS kaba peit ïa ka West Khasi Hills, ha ryngkat ka jingïadon lang jong u bah H.K Thabah Additional Deputy Commissioner, ki ophisar na kiwei pat ki tnad treikam ba kynthup ïa u Deputy Labour Commissioner ka West Khasi Hills Kong L.Syiemlieh District School Education Officer, u SDO ka West Khasi Hills, u ophisar jong ka Industrïal Training Institute kiwei kiwei ki heh sorkar, ki rangbah shnong bad ki nongpynmih ïa ki jait jingbam kum ki umsoh, ki ashar, bad kiwei kiwei kum ki tïar ki tar bad kiwei kiwei.
Ha kaba ïadei bad ka phang kumno ban weng ïa ki jingeh ha kaba ïadei bad ka ïoh kam ïoh jam, u bah Michael Thongni u ba la wan ban mihkhmat na ka Northeast Institute for Professional Studies. Nalor kata la ïoh ruh ïa ka jingpynshai ha kaba ïadei bad ka rep ka rïang da kaba khlem pyndonkam ïa ki dawai sboh, ba la pynshai da ka nongpynïaid jong ka Nongstoiñ Socïal Service Society.
La ïoh ruh ïa ka jingpynshai na u Deputy Labour Commssioner halor ki lad jingïarap kiba ka sorkar ka la mang kyrpang na ka bynta ki nongbylla bad ki nongshong shnong kiba treikam la jong, la ki dei ki nongkhaïi kiba rit ne kiba heh ruh kumjuh. U la pynshai ruh kumno ban ki nongkhaïi kiba shong dukan ki lah ban ïoh ïa ki lad jingïarap lada ki register ïa ki kyrteng jong ki lyngba ka Labour Department.
Nalor kata la ïoh ruh ïa ka jingpynshai na ka kong L.Syiemlieh DSEO halor ki bynta ba kongsan ha ka imlang sahlang lyngba ka pule puthi bad kiwei kiwei. Khatduh eh la sam ïa ki syrnod da u bah H.K Thabah sha ki nongseng kam la jong, kiba la lah ban pynmih shibun ki jait jingbam bad kiwei kiwei.
