Shillong, Naiwieng 09 : Ka FKJGP East Jaintia Hills ha kane ka sngi Saitjaiñ ba la dep hapoh ka jingïalam u President ka seng Bah Deihok Sumer ryngkat ki nongïalam ka seng ka la leit ban ai jingïarap sha ka lanot pluh ïing ha Deiñsha Lalu, East Jaintia Hills, Kong Porpynsuk Dkhar.
Katkum ka kyrwoh na ka seng la ïathuh ba ka iing jong katei ka longkmie ka la shah pynjulor lut ha ka ding ha ka 13tarik u Risaw 2024 haduh ba kim don shuh ka jaka sah.
Hashwa ban aiti ïa kitei ki song jingïarap la don ka jingïalang kaba lyngkot ba la pynïaid da u President ka Seng Bah Deihok Sumer u ba la kyntu ïa katei ka longiing ban pdiang ïa ki jingïarap jong ka seng watla ki long kiba rit lyngba ka jingnoh synñiang ki para dkhot jong ka seng.
La ong ruh ba hadien ba ki la ïoh jingtip ba katei ka longiing kan sdang ban shna thymmai ïa ka iing kumta hi ki la kular ban pynpoi 10 byrni ka dewbilat.
Ka Kong Porpynsuk pat ha ka jingkren ka la pynpaw ka jingsngewnguh ïa ka seng kaba la noh synniang na bynta ka longiing jong ka bad ai ruh ka jingkyrkhu kyrdoh na bynta ka jingsbun mynsiem jong ki.
Kane ka long katkum u kyrwoh na u Information Secretary ka Seng, Bah Michal Chyrmang.
