Da ka Ordinance yn pyndam ïa ka aiñ ïakhalai bad hadien yn sa pynskhem ha Assembly : CM

Shillong, Risaw 14 : U Myntri Rangbah ka jylla u Conrad K Sangma mynta ka sngi u la ong ba ka sorkar kan pyndam ïa ka aiñ ïakhalai Meghalaya Regulation of Gaming Act (MRGA) 2021 da ka Ordinance bad hadien kane yn sa pynkhem bad ïoh ka jingmynjur lang hapoh ka ïing Dorbar Thawaiñ ka jylla.
“ Ban pyndam ïa kane ka aiñ lah ban leh da ka Ordinance bad hadien kane yn sa pynkhem bad mynjur hapoh ka ïing dorbar ïa kata ka Ordinance” ong u Myntri Rangbah haba jubab ïa ka jngkylli hato ka sorkar kan khot ne em da ka Dorbar ba Kyrpang ban pyndam ïa kane ka aiñ.
U Myntri Rangbah u la ong mynshwa ka sorkar ka la pyndam ïa ka Meghalaya Street Vending Act lyngba ka Ordinance bad hadien sa pynskhem bad mynjur hapoh ka ïing Dorbar Thawaiñ.
“ Kumta kumjuh ruh lah ban leh ïa kino kino ki aiñ kiba ka sorkar ka kwah ban pyndam da kaba leh tang da ka ordinance namar kane ka dei ka rukom ba dei ban bud bad leh” ong u Conrad K Sangma.
ïa kane u myntri rangbah u la kren shisngi hadien ba u myntri ka tnad lum khajna ka sorkar jylla u James K Sangma u la pynbna ba ka sorakr ka la rai ban pyndam noh ïa ka MRGA 2021 hadien ba la mih ki jingpyrshah na ki seng bhalang, ki dorbar shnong, ki seng niam bad ki paidbah ban wanrah ïa ka Casino ha kane ka jylla.
U Myntri Rangbah ula pynthikna ruh ba da ka jingpyndam noh ïa kane ka aiñ yn ym thaw shuh da kino kino ki aiñ ban peit bad teh lakam ïaki kam ïakhalai hapoh ka jylla. “ Kumta mynta ngi la phai dien trai biang bad ngi hap ban peit bad bishar kumno ban ïaid shakhmat pat ha kane ka bynta” ong u Conrad.
U la ong ïa kane ka rai la shim hadien ba la ïamir jingmut bad kiba bun ki seng bhalang, ki nongïalam niam bad ïohi ruh ïaka jingpyrshah na kiba bun ba lang halor kane ka aiñ khalai. U la ïathuh ba ula ïaphylliew jingmut ruh bad u myntri ka tnad lum Khajna u James K Sangma shwa ban shim ïa kane ka rai bad pynbna sha ki paidbah ba la pyndam noh ïa kane ka aiñ.
Halor ka jingkynnoh ba ka sorkar MDA ka la shim ïa kane ka rai namar ka sheptieng ïoh rem kput ha ka election ne kane ka aiñ ïa khalai kan ktah ïa ka sorkar MDA ha ka election MLA 2023, u Myntri Rangbah ula ong ba ka sorkar barobor ka la ju pynpaw bad kan ïai bat ïa ka kular ba kan sngap beit ïa ka sur u paidbah.
“ Ngi sngewthuh ba haba ki paid nongshong shnong ki sngew pyrshah ïa kano kano, ka sorkar ka dei ban sngap kumba ka dei ka sorkar naka bynta ki paidbah kumta lada dei ka election ne ym dei ruh kaba kongsan ka long ba ka sorkar barobor ka buh ïa ka sur u paidbah hakhmat eh. Ha kiba bun ki khep phi la ïohi ba ka sorkar ka ïai leh ïakane lada phi ong ïa ka ILP la wanrah daka resolution hapoh ka ïing dorbar, ïa ka jingpynbeit pud ne ter ter ka sorkar ka sngap beit ïa ka sur u paidbah ba haba ki paidbah kim sngew ïahap ka sorkar ka bishar bniah biang ba leh beit ïa ka mon u paidbah” ong u Myntri Rangbah.
Hooid u la ong ha ka MRGA la kren shai ba ki trai jylla ne ki trai ri kim lah ban rung bad hap ban ïoh licence ruh ban sdang ïa ka kam, hynrei haba ki paidbah ki pyrshah ka sorkar ka sngap .Tangba ïa mynta hi shipor ym don aiñ ban teh lakam ïa ki kam ïa khalai kumba long naduh mynshwa kumta kin ïai bteng mynta ruh tad haduh ban da bishar bniah bad wad ki lad kumno pat ban leh.
Hooid halor kita ki jingkhuid ne jingbym khuid, u la ong ki briew ha kino kino ki bynta ruh ki buh beit hakhmat ïa kiei kiei bad halor kane ruh kumjuh ki briew kin pyrkhat. Hynrei kaei kaba ki paidbah ki pynpaw ka long ban wanrah da ka aiñ halor ki kam ïa khalai ka dei kata kaba ki tieng ïoh ka ktah jur ïa ka imlang ka sahlang da kumwei pat. Kumta halor kine ki jingpynsngew jong ki paidbah ba ka sorkar ruh ka sngew khia bad hadien ba la ïohi bad ïoh sngew ïa ki jingpyrshah la rai ban pyndam noh ïakane ka aiñ tad haduh ban da wanrah da kiwei pat lehse ki lad ki lynti ban tehlakam ïa ki jingpynïakhalai be-aiñ ha ka jylla.