Nongpoh, Nohprah 21: Kum ka jingangnud ban dang shakri na ka bynta ka bha ka miat jong ki Dribar Auto Rickshaw bad kumjuh ruh ki trai jong ki Auto Rickshaw ha ka thaiñ Nongpoh, ka Nongpoh Auto Owner’s & Driver’s Association (NRAO&DA) mynta ka sngi ka la lah ban plie paidbah noh ïa ka ophis treikam ba pura ban bteng ïa ka jingshakri na ka bynta ki nongleit nongwan ha ka thaiñ Nongpoh.
Ïa kane ka ophis ba la buh ha phylla ka ophis u DTO Nongpoh, la wan ban plie paidbah da u Bah Mayral Born Syiem, MLA ka Nongpoh kum u kongsan bad la sakhi lang ruh da ka jingdon lang u MVI ka Nongpoh u Bah John Nongrang, u Adviser ka Association u Bah Plielad Tiewsoh, u Rangbah Shnong ka Umlyngkdait u Bah Never Makdoh, u President u Bah Bannassar Lyngdoh bad kynthup ki nongïalam bad ki dkhot na ki Unit bapher bapher ba hap ha ka thaiñ Nongpoh.
Ha kane ka jingplie ïa kane ka ophis treikam, la pynlong ruh ïa ka jingïaot cake kum shi bynta ban rakhe ïa ka jinglehkmen ïa ka Christmas bad ruh na ka bynta u snem thymmai, ba ka Association ka angnud ban bteng ïa ka jingshakri na ka bynta ka bit ka biang ki para dribar bad ruh ban ai ka jingshakri kaba paka tam ïa ki nongleit nongwan hapoh ka thaiñ Nongpoh.
Haba kren ha kane ka sngi kum u kongsan, u Bah Mayral Born Syiem, u la pynpaw ïa ka mynsiem jong ka jingkmen ba kane ka kynhun ka la lah ban buh la ka jong ka ophis treikam ba pura bad kane ophis kan long shisha kum kata ka shlem ha kaba kin ïa shong pyrkhat ban saindur ïa ka bha ka miat jong ki para dribar bad ruh na ka bynta ban ai ka jingshakri kaba paka ïa ki paidbah ha ka thaiñ Nongpoh.
U la kyntu ruh ïa ki nongïalam bad ki dkhot kane ka Association ba kin trei hok ïa la ka kam bad ban don kata ka mynsiem jong ka jingïatylli bad dei tang ka jingïatrei lang ba kin lah ban ai kata ka jingshakri kaba paka tam kum kata ka kynhun kaba ai jingshakri ïa ki paidbah ha ka leit ka wan.
U la pynpaw ruh ba kum u MLA un kloi ba ai ka jingïatrei lang la ka long ha kano ka kam kaba ai jingmyntoi ïa ki paidbah bad un ïaid don ryngkat ruh ban kyrshan ïa kane ka Association ha ki kam bapher bapher kiba ka shakri na ka bynta ka jingmyntoi ki paidbah.
