Shillong, Rymphang 26 : Kum ka dak ka jingai burom bad ban kynmaw ïa ka jingwan sah jong u Rabindranath Tagore hangne ha Nongbah Shillong ha ki shi spah snem mynshwa na ka liang u Myntri ka tnat Arts and Culture bad uba khmih ruh ïa ka Tourism ha ryngkatlang bad u Chairman ka MTDC bad u Myntri barim ka arts and Culture u Bah Sanbor Shullai ha ryngkatlang bad ki heh ophisar ki Engineer ki la leit ban jurip ïa ka Rabindranath Tagore Cultural Complex kaba don marsyndah bad ka State Assembly kaba ha Rilbong Shillong ha ryngkatlang ïa ka Surok kaba don ha kane ka Complex kum ban pynïaid shakhmat ïa kaei kaba la sdang.
“Ka jingthmu jong kane ka jingjurip ka long ban shna ïa ka Museum, ka Cafe, ka parking lot, ha kajuh ka por ban pynbna ruh ïa kane ka jaka kum ka Heritage Building kaba u Rabindranath Tagore u la sah ha kane ka jaka kaba la palat spah snem ha ki por ba u Tagore u la wan sha Shillong,” ïathuh u Myntri haba ïakren bad ki lad pathai khubor ha ka sngi Nyngkong.
U la ïathuh ruh da kaba ong ba ïa kane ka projek kaba la sdang da u Bah Sanbor Shullai ha ka por ba u la long u Myntri ka art and Culture mynta ka la poi ha ka kyrdan ban jam shakhmat bad ïa kane ka kam kan long hapoh ka jingpeit jong ka art and Culture bad ka PMC bad ka HLCS bad kane ka projek la mang kumba T. 15 klur kaba sah mynta ka long ban buh noh ïa u mawnongrim ha ka 9 tarik u bnai Lber bad hadien kane ynsa sdang ban pyntrei noh ïa ka kam.
U la ïathuh ruh ba ïa ka tender lah dep khot bad ka jingaiti ban pyntrei ïa ka kam ka la ïaid bad ban ai ïa ka kontrak.
Halor kane u Bah Paul Lyngdoh u la ïathuh ba u Tagore u la wan laisien sha Shillong bad ka don ruh kawei ka kamra thiah kaba u la ju pyndonkam ban thoh ruh ïa ki 3 tylli ki kot ha Nongbah Shillong ha kitei ki sngi ba u la sah ha Shillong.
“Ngi sngewtynnad ruh ba mynta ka Sngi ngi la lah ban pynbeit ïa kane ka kam bad ha shwa ban sdang ïa ka kam ngin sa buh noh ïa u mawnongrim ha ka 9 tarik u bnai Lber,” ong u Bah Paul da kaba bynrap ruh ba ynda la dep ïa kane ka kam kan sa lah ban long ka jaka ka ban khring ïa ki nong jngohkai pyrthei.
