Nongstoiñ Rymphang 28: Ka Nonglang Pungsier Angler Associtiation (NPAA) kadei ka synjuk jong ki rawon kaba kynthup ia ki samla bad ki rangbah na ka shnong Nonglang bad ki shnong ba mar jan kum ka Umwhlang,Mawsyrpad, Langja bad kiwei kiwei kaba ïaleh ban ïada bad pynneh pynsah ïa ki doh um doh wah ha shilynter ka wah Tyrsung bad ki shnat jong ka. Katei ka seng ka la trei kam la palat arphew snem tam haduh mynta ban pahara ïa ka wah Tyrsung bad ki shnat jong ka. Naduh da kaba pynlong ïa ka jingpahara da ki dkhot kiba la phiah ha ki group kat kum ki por.Ki dkhot jong katei ka seng haduh mynta ki la don palat shispah ngut .U bah K.B.Syiemlieh secretary katei k haba ïakren bad u nongthohkhubor u la ong ba haduh kine ki sngi ka seng ka dang ïaibteng ban pahara ïa katei ka wah naduh u bnai Nohprah manla u snem khamtah eh haduh u bnai Jymmang hynrei naduh u bnai jymmang lei lei habaroh shilynter katei ka wah bad ki shnat jong ka da ki phew ngut ki rawon ki don man la ka sngi ym tang ki shynrang hynrei wat ki kynthei ruh da ki phew ngut manla ka sngi ki don.
U bah Syiemlieh u la ong ruh bat eng teng ki ju pynlong ïa ka jingïakop khwai paralok khlem da pynlong kino kino ki jingpynbna paitbah bad ki ju ai da ka buskit kaba heh kumba leh kiwei pat ki ba pynlong ïa ki ïakop khwai dohkha ha ki pung,hynrei ki shu pynlong tang kum ka jingïalehkai sngewbha bad ba ki rawon kin pyni ïa ka sap khwai kaba ki don.U la ong ruh ba mynta u snem katei ka seng ka la nang pynkhlaiñ shuh shuh ïa ki kyndon treikam ban pyrkhing ïa ka jingpynïap pathar ïa ki doh um ha katei ka wah bad ki shnat jong ka.
U bah Sevenstar Syiemlieh uwei na ki dkhot jong katei ka seng u la ong ba da ka jingtrei shitom bad ka jingïatylli jong ki dkhot la lah ban khanglad ïa shibun ki riew shim kabu kiba thmu ban wan ban pynïap dohkha da kaba siat bom,ai dawai bih bad khang jar,U la ïathuh ruh ba ha u snem ba la dep bun tylli ki jarkhang la lap ha katei ka wah hynrei ym shym la lap satia ïa ki briew ha kaba ki dkhot ka seng ki la pynjot noh ïa baroh ki jar.
Ha kajuh ka por u la ong ba na ka liang jong u u kwah ba ym dei ban ïada tang ïa ki doh um hynrei ïa ki mrad ki mreng ,ki sim ki doh bad baroh ki jingthaw ba im. U la ïathuh ba ha kine ki snem ki mrad khlaw kum ki skei,ki sniang khlaw,ki diengkhied,ki syiar khlaw bad kiwei kiwei ki la sdang roi sted bha hynrei ki don pat ki briew na kiwei pat ki shnong ba marjan kiba ju wan beh thong man ka por bad don teng teng ba ha ka shisngi ki ioh haduh ar bad lai tylli ki skei.
Khatduh eh u la ong ba ka jingïada ban pynneh pynsah ïa ki mrad ki mreng ,ki sim ki doh ka la don kam eh ha kane ka pateng ba mynta bad ka awareness programe ne ka jingai jinghikai ïa ki paitbah ba kin sngewthuh ka la don kam kyrkieh ha kine ki sngi ha man la ki jaka.
U la kyntu ruh ïa ki bor synshar shnong bad ki paitbah ba kin smgewbha ban kiar raimaw rai dieng ban pynïap p;athar ïa ki mrad ki mreng,ki sim ki doh bad kiwei kiwei ki jingthaw ba im namar lada ym don ki mrad ki sim ki doh bad kiwei kiiwei ki jigthaw ba im wat ka mariang ruh ka long suda bad ka kynjah hynrei da ka jing don jong ki sim ki doh bad kimrad ki mreng ka pyn sngewtynnad lyngba ki sur ba ki pah ki rwai ha ki khlaw ki btap.
