Mawkyrwat, Kyllalyngkot 07 : Kum shibynta jong ka jingrakhe ïa ka jingdap 10 snem jong ka jingïaid lynti ka Hynñiewtrep National Youth’s Front (HNYF) jong ka South West Khasi Hills District mynta ka sngi ka la pynlong ïa ka jingïakop mareh marathon ha shnong Mawkyrwat, South West Khasi Hills District kaba la sdang naduh IB PWD (Roads) bad pynkut ha ka juh ka jaka.
U kongsan ha kane ka sngi u dei u samla Benjohnson Lyngdoh ha ryngkat da ka jingïadonlang u bah Shiningstar Wanniang, Vice President ka HNYF, South West Khasi Hills District bad kiwei de ki nongkitkam ba hakhmat jong ka HNYF.
U samla Benjohnson haba kren ha ka jingïalang ba lyngkong u la ong ba ka jingdon ki sengbhalang bapher bapher ka la long shisha ka jingmyntoi kaba khraw ha ka imlang sahlang ha kiba bun ki bynta. Kumta, ki kynhun sengbhalang bapher ba pher ki ju pynlong ïa shibun ki jait jingïalehkai kiba long ka jingmyntoi ïa ki samla, ki hep kiba rit bad wat ïa kiba la heh la san ban kyntiew ïa ki samla ha kaba ïa dei bad ki kam ïalehkai.
U la ong ruh ba lyngba kane ka bynta kan long ruh shibynta ban ai mynsiem bad pynshlur shuh shuh ïa ki ha kaba kumno ba kane ka dong ka thaiñ kan pynmih ïa ki samla shynrang bad kynthei ban pyn i ïa ki sap ki phong jong ki, khamtam hangne hapoh ka South West Khasi Hills District bad ban long ruh ki khlur ïalehkai ha ka jylla hi baroh kawei.
Ki nongjop ha ka Junior Boys ki long u Richardmarkson Ramsiej, u Mejiedkyrpang Pariong, Derickson Lyngdoh Kynshai, bad u Mebaniainehskhem Marweiñ katba ki Junior Girls ki long ka Teilyntishisha Ramsiej, ka Merifullness Ramsiej, ka Elfidari Wartde bad ka Lahunmynsiem Ramsiej.
Nangta, ki samla shynrang kiba la kham rangbah ki long u Welbetstar Ramsiej, u Jompsingstar Ramsiej, u Iwelljohn Ramsiej katba na ka liang ki kynthei pat ki long ka Kyntimon Marweiñ, ka Lyntijingkyrmen Kharjahrin bad ka Marqueenless Ramsiej.
