Da ka lynti kaba dei, yn ïakhun ka UDP halor ka Reservation Policy bad Roster ,ong u President ka UDP

Shillong, Ïaïong, 18: U President jong ka United Democratic Party (UDP) u Bah Metbah Lyngdoh uba long ruh u Chairman ka State Planning Board (SPB) ha ka sngi Baar u la ong ba ka party kan ïakhun da ka lynti kaba dei ne ha ka rynsan kaba ïahap halor ka ishu Reservation Policy bad ruh halor ka Roster System ka ban ym ktah ia kano kano ruh ka jaidbynriew hapoh ka jylla.
Ïa kane u la pynpaw haba kren bad ki lad pathai khubor hadien ba u kyrtong ka UDP na Sohiong, Bah Synshar Kupar Roy Lyngdoh Thabah u la dep ban thep kyrteng na bynta ka elekshon MLA kaban sa long ha ka 10tarik u Jymmang mynta u snem.
Haba jubab halor ka jingkylli, u Bah Metbah u la ong ruh ba ka rynsan kaba biang ban ïakren ïa kitei ki mat kadei beit markhmat bad u Myntri Rangbah ka Jylla, Conrad K Sangma. “Ka rynsan kaba biang eh kadei bad u Myntri Rangbah. Ngi la dep ruh ban pynsngew ïa kine ki ishu bad na ka liang jong u ruh u la pynpaw ba un sa bishar bniah.”
Haba jubab halor ka nongrim jong ka UDP haba ïadei bad ka Roster System, u Bah Metbah u la ong ba katei kadei ka mat kaba khluit bha.
“Uno uno um lah satia ban ong ba nga lah ïa kane lane nga lah ïa katai namar ngi don hangne na bynta u paidbah jong ka jylla. Da ka jingkitkhlieh ngi hap ban pynthikna ba kaei kaba ngi rah ka dei ban long ha ka rukom kaba biang bad kaba dei,” u la bynrap biang.
U Bah Metbah u la ïaiban ruh ba ka Roster kadei ka ishu kaba khia bha bad kaba donkam ruh ban don ka jingïatai kaba sani hapdeng ka sorkar bad ruh bad ki paidbah. “Hangta ngin sa ïoh ban pynsngew ïa ki mat jongngi bad ai ruh ki jingai jingmut.”
U la pyntip ruh ba mar ïa shimti u Conrad ïa ka shuki Myntri Rangbah u la leit ban kynduh hi markhmat ban ïa kren halor ka reservation policy bad ruh ka roster system.
“Nga la wanrah hakhmat jong u Myntri Rangbah ïa kane ka mat ba khia bha kaba donkam ban ïakren bniah naka bynta ka bha ka miat jong baroh ki Jaidbynriew ha Jylla bad ka sienjam ban shim ka dei ban long da ka lynti kaba jai jai bad ka jingsuk bad kaba pynhun lut ïa baroh” ula bynrap.
Ula ïai ban ba ka kam ka dei kaba khia bha haduh katta katta bad donkam ban hap ïakren bniah bad ki kynhun bapher bapher ha ka Sorkar bad ong “Ngin sa buh ïa ki mat jong ngi bad ngin sa ai ïa ki jingai jingmut halor kane ka kam”.
U Bah Metbah ula kyntait ruh ban kynthoh halor ka jingdawa jong ka VPP ban shong bishar thymmai ïa ka State Reservation Policy bad ong “Ngam don jingtip halor kane ka mat ba la rah da kawei pat ka seng saiñ pyrthei. Nga don jingsngew tang ïa la ka jong ka seng saiñ pyrthei”.
Haba kdew ba ka UDP ruh ka la kren shai ïa ka jingdonkam ban bishar thymmai ïa ka Reservation Policy ha ka mat ïalap elekshon, u Bah Metbah ula ong “Kane ka dei kaba nga ong, ngin shong bishar thymmai ha kano ka lynti? Ha ka rynsan kaba dei. Kane ka dei kaba ngi hap ban sngewthuh”.
U Bah Metbah ula pynpaw ruh ba um don jingtip mano ba wanrah ïa ka mat halor ka jingdonkam ban khot ïa ka Dorbar Kyrpang ka ïing Dorbar ban ïakren halor ka Roster System bad ong ba kane ka kam ka donkam ban hap ïatai shuwa ha ka rynsan kaba dei bad ngin sa ïapeit nangne kumno ban leh.