Da ka jingphuh jingphieng, pynkut ka SSSM ïa ka jingrakhe dap 30 snem jong ka ha Mawkyrwat

Mawkyrwat, K’lyngkot 08 : Ka Seng Samla Shnong Mawkyrwat (SSSM), South West Khasi Hills District da ka jingphuh jingphieng ka la ïoh ban pynkut noh ïa ka jingrakhe ïa ka jingdap 30 snem jong ka jingïaid lynti ha kaba ka phang ka long, “Ki samla ki nongpynbha bad ki nongtrei, ïa ka mynta bad ka lawei”, ha phyllaw jong ka Community Hall, Mawkyrwat bad u bah Renikton Lyngdoh Tongkhar, MLA ka Mawkyrwat Constituency u la long kum u kongsan.
Lah ban kdew ba ka Seng Samla Shnong Mawkyrwat ka la ïoh ban pynlong ïa shibun ki jait jingpynbyrngia ha baroh shi taïew kaba ki la sdang naduh ka 23 tarik u bnai Nohprah, 2023 bad pynkut pat ha ka 6 tarik u Kyllalyngkot, 2024. Ki jingïalehkai kiba kynthup ïa ka jingïalehkai Kynting Mawsan, Mawpoiñ, Volleyball, Basketball, Tit-Dibit bad kiwei. Nangta, la ïoh ruh ban pynlong ïa ka jingpyn-i ïa ki sap ki phong ne ka talent show jong ki samla bad ka jingïakop ‘thei bad ‘rang bha briew jong ka Shnong Mawkyrwat.
Ha ka jingïalang ba lyngkot, u Renikton Lyngdoh Tongkhar, MLA ka Mawkyrwat Constituency haba kren kum u kongsan u la ong ba haba phai ha kine ki lai phew snem kiba la leit shibun bah kiei kiei kiba la jia hapoh ka Shnong Mawkyrwat hynrei kawei kum ki samla kim dei ban klet pat ka long ba ki dei ban ai nguh ïa U Blei Trai Kynrad ba dei ma U Uba la don ryngkat ha ki por baroh hapdeng jong ka jingïalynti jong ki ba shibun bah ki kam kum ki samla ki la jop ha ki jingïaleh.
U la ong ruh ba watla ka shnong Mawkyrwat ka dei ka shnong kaba rit, hynrei ka la pynmih shibun ki ‘riew khraw kiba don ka jingkitkhlieh ïa ka bha ka miat hapoh jong ka shnong ka thaw bad ha ka imlang ka sahlang baroh kawei. Namarkata, u la ai mynsiem ïa ki khun samla jong ka shnong Mawkyrwat ba kin nang ïabeh sha ka thong jong ka jingwanrah ïa ka jingbha jingmiat ha ka shnong ka thaw bad ban long ruh kiba shlur ban sei ïa ki sap ki phong ha ki jingïaleh kiba bun kum ha ki jingïalehkai bad khamtam eh ha ka jingpule.
U bah Kitborsing Lyngdoh, President jong ka Seng Samla Shnong Mawkyrwat ha ka jingkren jong u u la ong ba kum ka Seng Samla Shnong ka la leh ïa shibun ki kam na ka bynta ka shnong ha shibun ki jingeh ba ki ïa kynduh ha ka jinglynti ïaid jong ki kum ki samla kiba peit ïa ki jingbha hapoh ka shnong ka thaw ha kine ki 30 snem. U la ong shuh shuh ba ka jingpynlong ïa kum kine ki jingïalehkai bapher bapher ka long ruh kum shibynta ban tehsong ïa ki samla hapoh ka shnong ryngkat ka jingthmu ban pynïalong kawei bad ruh ban pyni-i ha ki ïa ka lynti ba bha khang ba kin lait na ki kam sniew khamtam eh ba kin lait na u drok.
Ha kane kajuh hi ka prokram la ïoh ruh ban pynkup burom ïa ki nongkitkam barim jong ka Seng Samla Shnong Mawkyrwat kumjuh ruh ïa ki rangbah shnong bad ka jingaisngewbha ïa ki nongïashimbynta ha ki bynta bapher bapher ha kane ka jingrakhe lehkmen.
Haba phai ha ka jingïakop ‘thei bad ‘rang bha briew, ïa ka nam ‘thei bha briew jong ka Shnong Mawkyrwat la rah da ka Miss Ibadapynhun Lyngkhoi, ba-ar ka Emily Lyngdoh bad ba-lai ka Amanda Kurbah. Katba nongjop napdeng ki ‘rang bha briew pat ki long u Mr. Pynbhalang Snaitang, ba-ar u Rishanbor Lyngdoh Mawlot bad ba-lai u Eborlang Thongni.
Nalor u kongsan kiba la ïa donlang ki long u bah Robertjune Kharjahrin, ki nongkitkam jong ki Seng Samla Shnong ba marjan, bad kiwei de ki ‘riew rangbah kiba la shah khot sngewbha ha kane ka jingrakhe.