Nongstoiñ, Rymphang 17: Ka shnong Kyrshai ka dei ka shnong kaba don ha khappud bad ka jylla Assam bad kaba la pynïakhlad bad ka shnong Ukiam da ka wah Rambrai. Ha ki snem ba mynshuwa la pynïasoh ïa ka shnong Ukiam bad ka shnong kyrshai da ka jingkieng doi doi kaba da ki sainar bad kaba long tang ban ïaid ki briew bad ki kali ar shaka ruh manla ka sngi ki ïaid lyngba katei ka jingkieng sainar. Dei tad hadien ba ka sorkar Meghalaya ka la pynbna ba kan shna ïa ka surok arlaiñ na Nongstoiñ sha Kyrshai haduh Chayagaon lyngba ka Rambrai ba ka sorkar Assam ka la pynsted ban shna da ka surok ar laiñ na Chaygaon shaduh Kyrshsai bad mynta ka ladep ym tang ïa ka surok hynrei ka la shna ruh da ka jingkieng heh kaba skhem kaba pynïasoh na Ukiam sha Kyrshai.
Ka sorkar Assam tang hapoh shisnem ka la pyndep ban shna ïa katei ka jingkieng kaba jrong kumba sanphew haduh hynriewphew mitar. Ka jingshna jong ka sorkar Assam ïa katei ka jingkieng ka la pynsuk haduh katta katta ïa ki paidbah na ki shnong kiba don ha katei ka thaiñ kum na ka shnong Umbah, Darephang, Nongspung, Kyrshai, bad ha ka por tlang ki paitbah na kiwei pat ki shnong naduh Mawdumdum, Mawthir, Rambrai,Nongkyllang bad kiwei kiwei ki shnong ki leit sha ïew Ukiam da ki kali Mahindra pickup fourwheel bad wat ki don ruh ki kali Mahindra Max fourwheel kiba mih na Rambrai leit ban kamai sha katei ka ïew.
Haba phai pat sha ka sorkar Meghalaya ka long kaba sngewlehraiñ namar ba watla ka la pyntrei ïa ka surok ar laiñ naduh Nongstoiñ hynrei ka la shakut noh tang ha Mawthir bad hashwa ban pyntrei ïa kane ka surok na ka liang ka sorkar Meghalaya, ka la pynbna ba katei ka surok ka dei na Nongstoiñ – Rambrai – Kyrshai haduh Chaygaon phewse mynta pat ka dei pynban tang ka surok na Nongstoiñ-Rambrai-Mawthir. Ka sorkar Meghalaya kam salia ban pynbiej ïa ki paidbah ba hana ïakatei ka surok dang pyntrei tang ïa ka phase I.
Ha kaba ïadei bad katei ka surok, na ka liang u bah Albert Nonglang sordar jong ka shnong Kyrshai haba ïakren bad u nongthohkhubor u la ong ba ka jingpyntrei ïakatei ka surok tang haduh Mawthir ka la pynlyngngoh haduh katta katta ïa ki paidbah jong katei ka thaiñ bad u la ong ruh ba na ka liang jong u bad ki nongsynshar shnong jong katei ka thaiñ ki kyntu jur ïa ka sorkar Meghalaya ba ka dei ban pynshai halor katei ka surok, hato kan bteng ban pyntrei ne kan pynsangeh noh tang ha Mawthir namar haduh mynta mynne ym pat ïohi dak ei ei ruh em ba ka jingpyntrei ïa katei ka surok kan dang bteng bad kam dei ban pynsah ha ka lyngngoh 9a ki paidbah nongshong shnong jong kane ka thaiñ.
