Tura, Nailur 16 : Ka jingïakhih kaba jur ka la ap mynta ha Garo Hills Autonomous District Council hadien ba ka Executive Committee kam shym la lah ban siew ïa ka tulop ki Nongtrei jongka ba la pynsahteng haduh 30 bnai, wat hadien ka jingaipor jong ki Nongtrei kaba kut noh ha ka 15 tarik Nailur.
Da ki spah ngut ki Nongtrei ka GHADC kiba don ha ka shatri jong ka Non-Gazetted Employees Association, ka la aipor khatduh ïa ka Executive Committee ba khlieh da u Albinush Marak jong ka NPP, hapoh ak 15 tarik Nailur ban siew pynkhuid noh ïa baroh ka tulop ba pynsahteng.
Ki Nongialam kane ka synjuk ki la ïakynduh ïa u CEM bad ka Executive Committee ha ka 29 tarik Nailar ban kyrpad halor ka tulop bad ruh ban buh por artaiew ïa ka EC ba kan pynmih pisa ha ka ban siew noh ïa ka hok ki nongtrei.
Kane ka synjuk ki Nongtrei kan shong jingïalang lashai ka Lah Sngi U Blei ha Tura ha kaba ki nongïalam kin sa pynbna ïa ki sienjam ba kin shim bad kaei kaba la paw pyrthei ka dei ka jingsangeh treikam jong ki nongtrei, ka ban lam sha ka jingkhang khyrdep shisyndon jong kane ka Council.
Ka jingkhang kyrdep lada rai ki Nongtrei, kan pynsangeh lut ïa baroh ki kam pynroi bad ka jingpynmih pisa khamtam ka jingsiew ïa ki khajna bat jaka na kylleng ki 5 tylli ki District ka Ri-lum Garo.
Nalor ka jingktah ha ka khajna jaka, ka jingsam umbam umdih ruh ha kiba bun ki bynta ka Tura, kan sa shah ktah jur namar ka dei ka Council kaba dang peit ïa ka jingsam um sha kiba bun ki shnong jong ka sor Tura.
Kaba kham pynsniew shuh shuh, ki khubor ki la mih napoh ka District Council ba ka Executive Committee ka don jingthmu ban siew shuwa tang arbnai ka tulop kum ka instalment ba nyngkong bad sa arbnai yn sa siew ha u bnai Nohprah.
Ki bor pyniaid jong ka District Council la pyntip ba kim shym la lah ban pynmih pisa ha ka ban siew ïa ka tulop ba pynsahteng jong ki Nongtrei kiba la dawa la slem ban pynkhuid noh.
Ha ka jingiakynduh ba khatduh hapdeng u CEM Albinush Marak bad ka EC lem bad ka synjuk ki Nongtrei ba la khlieh da u Brithen M Sangma, la pyntip sha ki halor ki jingeh bad ki jingkordit ba hap ban mad da ki nongtrei ha ka ban ïoh pisa ban pynïaid ïa la ka ïing ka sem bad ban siew bai skul ïa la ki Khun.
Kila pyntip ba ha ki katto katne ki skul, Ki kmie ki kpa ki la sangeh ban phah skul ïa la ki khun namar ka jingbym lah ban siew ïa ka bai skul.
La pynbor ruh ïa ki nongtrei ba kin shim ram na ki nongairam ha ka sut kaba heh tang ban ïoh buh ïa ka bam halor ka miej lane ban leit shim dawai dashin ïa la ki jong ki ba haïing hasem.
