Da ka jingai jingmut ki longkmie ngi lah ban pynmih ïa u synñiang ïarap ïa ki longïing : Bah Staising

Mawkyrwat, Jylliew 25: Ka jingïarap jong ka kynhun ki ‘riew paidbah na kylleng sawdong ka Ri Khasi ba la ïalam da u bah Staising Kharbteng kiba la pynmih ïa u synñiang ban ïarap ïa ki longïing ba la shah pynjulor ha ka bor mariang ka la ïai bteng ban leit sa ha ka shnong Lyngkien Sunei harum Mawphlang kaba dei ka ïing jong ka kong Badabetsha L. Mawphlang bad u bah Jilstar Syiemiong ha ka 25 tarik u Jylliew, 2022.
U bah Staising Kharbteng ha ka jingkren jong u ha ka jingleit sha katei ka longïing ryngkat ka jingïadonlang jong ki katto katne kiba la ïadon bynta ban pynmih ïa u synñiang u la pynpaw ba dei lyngba ka jingai jingmut ki longkmie ban leh ei ei ban ïarap ïa ki longïing kiba la mad ïa ki jingshah pynjulor ki ïing ki jong ki, khamtam kiba la duh noh ïa ki mynsiem bakordor.
Ïa kane ka jingai jingmut ki longkmie u la ong ba u pashat jingmut sha kiba bun balang bad tang ha i por ba lyngkot la ïoh ïa u synñiang ba la ïa sei para ‘riew paidbah bad ïoh ïa ka lad ban noh synñiang sha lai tylli ki longïing kiba kynthup ha shnong Laitlarem, Nongspung kaba ki la leit ha ka 22 tarik u Jylliew, ha shnong Jashiar kaba don ha thaiñ Mawkyrwat ha ka 23 tarik u Jylliew bad mynta ka sngi ka 25 tarik u Jylliew, 2022 ha shnong Lyngkien Sunei kaba don harum Mawphlang, u la ong.
Haba phai sha ka longïing ka kong Badabetsha L. Mawphlang bad bah Jilstar Syiemiong, na ka liang u bah Staising Kharbteng u la ong ba haba peit ïa ka jingrung ka khyndew ha kamra thiah ka dei ka jingïada U Blei ba ki la lait na ki jingmynsaw bad jingjia ba sngewsih ban pynlong ïa ki ban khie noh na jingthiah ha shuwa ba ka jingtwa ka khyndew kan jia long. U la ong, ma u bad kiwei kiba la don ha katei ka longïing ha katei ka sngi ki long tang ki nongpynpoi ïa u synñiang jong baroh ki nongnoh synñiang ba sbun bad kylluid mynsiem. Kumta ha ka kyrteng jong ki, u la kitbok kitrwiang ïa katei ka longïing ba kin bit kin biang bad ïoh ïa ka met ba shait ba khlaiñ nangne shakhmat da ka jingkyrkhu U Blei Trai Kynrad na jrong.
U bah Arbistar Lyngdoh uba dei u Rangbah Shnong u la pynpaw ba ka jingdon ki nongtrei mon sngewbha ban leh isynei kum kane ka kynhun kan long shisha ka jingkyrkhu ïa ki longïing ba mad ïa kum kitei ki jingjia bad kyrmen ba kiwei ruh kin ïa mihkhmat kum kane ka kynhun.
Ha kane ka sngi la ïadonlang ruh ki katto katne ki ‘riew rangbah kiba la ïasynranglang ha kane ka jingleit ban noh synñiang.