Nongpoh, Nailur, 15: U Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem ha ka sngi Thohdieng u la pynpaw ka jingsngew myllung ban iohi ïa ki jaka ki puta, ki kamai ki kajih ba la ban klun da ki bar jylla khamtam ha ka thaiñ Khanapara, ka thaiñ khappud, bym iohi shuh ïa ka dur ki Khasi ba kin leh ïa ka khaïi ka pateng bad bun na ki bar jylla kim kheiñ snep shuh wat ïa ka District Council.
“Ka jingwan hiar jong nga bad ka Executive Committee mynta ka sngi ka long kum ka jingai mynsiem ïa ki khun samla kiba don sap ha ka khaïi ka pateng ban pynshlur ïa ki ban mih shakhmat ha ka kam khaïi pateng khamtam kito ki samla kiba la dep ïa ki jingpule bapher bapher ban ioh knieh biang ïa ki kam ki jam ba la leh da kiwei pat ki jaitbynriew, namar katkum ka United Khasi Jaiñtia Hills Trading by non-tribal Regulation Act ba kino kino ki kam ba la lah da ki Khasi ban trei ngi hap ban weng noh ïa ki license ba la ai sha kiwei pat ki jaitbynriew” la ong u Bah Pynïaid da kaba bynrap ruh ba sa shisien ngi kwah ba ka ri Khasi kan don ka jingshngaiñ haka khaïi ka pateng.
Ka thaiñ Byrnihat, Jorabad, Khanapara ki dei ki jaka ba la batbor bha da ki bar jylla naduh ka khaïi ka pateng, ki kam ki jam kiba dei ruh ki jaka khappud bad ka Assam bad kaba sngew lyngngoh ba kitei ki bar jylla kiba wan trei wan ktah bad wan ban kamai spah kim ju pynbiang ïa ki kot ki sla bad ïaid katkum ki kyndon hynrei ki leh mon bad ioh mon namar ym ju don ba nud ban ang bad ban kyndang ïa ki.
Hynrei kane ka jingpyrshang biang jong ka KHADC ban pynkyndit bynriew ïa ki bar jylla bad kan ngeit skhem ba kan wanrah ka jingkylla ban pynim biang sa shisien ïa ka khaïi ka pateng kumba la angnud da ka KHADC ba ki kam ba ki lah ki Khasi yn weng noh ïa ki License ba lah ai sha ki bar jylla bad kane ka long ka jingkyrmen ïaki khun samla kiba khlem kam khlem jam ban knieh biang ïa ka kamai kajih ba la wan ban klun da ki bar jylla kumba ka Council ka la pynshlur bad don ryngkat ban kyrshan ïa ki.
U CEM u la kren shai ruh ba ka KHADC kan sa tei ruh da ka kynja ïingshong basa ha ka thaiñ khappud ka Khanapara kum ka jingpynneh ruh ïa u pud u sam bad ka khyndew ka shyiap ba ki khun samla jong ka ri Khasi kin ioh ban shong lane sah jah thaid haba ki leit sha Guwahati lane ki wan na kano kano ka jaka.
