Da ka ïingskul aiti u MLA ïaka St. Anthony’s Secondary School haka sngi rakhe Children’s Day
Nongpoh, Naiwieng 14: Hapdeng ka jingkmen kaba khraw kaba dei ka sngi burom ïaki khynnah ne ka Children’s Day ban kynmaw burom ruh ïaka sngikha jong u Pandit Jawaharlal Nehru u ba dei u Prime Minister ba nyngkong ka ri India, u MLA ka Nongpoh u Bah Mayral Born Syiem mynta ka sngi u aiti syndon da ka ïingskul ba paka sha ka St. Anthony’s Secondary School, Kharpati ha Ri-Bhoi bad kumjuh ruh ka paiñkhana paidbah bad ban shim bynta ruh haka jingrakhe lehkmen lang bad ki khynnah pule jong katei ka skul.
Ha katei ka sngi burom ïaki khynnah ne ka Children’s Day la wan ruh ban shim bynta lang da u RR Kleiñ Syiem ka Raid Kharpati, Sr Anima CM Headmistress ka St. Anthony’s Secondary School Kharpati, u Jayanta Mudoi bad ka kong Ibadahun Kharkongor kiba la wan ban mihkhmat na ka HDFC Bank bad kiwei kiwei ki riew rangbah lem bad ki kmie ki kpa, ki khynnah pule jong katei ka skul kiba la shim bynta ruh haki jingrwai bad ki jingshad bapher bapher ban lehkmen ïa katei ka sngi burom ïaki khynnah.
Ïa katei ka ïingskul bad ka paiñkhana la shna lyngba ka skhim MLA bad kumjuh ruh ka jingnoh synñiang jong kiba bun ki riew rangbah bad ki kynhun bapher bapher ban pyndep ïaka haka rukom kaba itynnad.
Haba kren ha katei ka sngi naka liang u Bah Mayral Born Syiem kum u MLA u la pynpaw ka jingsngewkmen kaba khraw ban iohi ïaka jingkylla bad ka jingkiew shaphrang jong katei ka skul ha kaba um shym poi pyrkhat ba katei ka skul kan ioh ban shna lane lehbha wat haka jingïarap barit jong u lyngba ka skhim MLA, hynrei ka dei ka jingstad jong ki bor pynïaid skul ban kyntiew shaphrang bad ban pynjanai ïaka rukom shna khamtam ban long kum kawei naki shlem pule ban ai ka jingshakri kaba paka sha ki khynnah ha katei ka thaiñ.
U la ong ruh katei ka jinglah ban lehbha jong katei ka skul khamtam ban pyndonkam hok ïaka skhim kala pynum mynsiem ïa u ha kaba kum u MLA u la kular ban dang bteng ki lad jingïarap sha katei ka skul naka bynta ki jingdonkam bapher bapher namar ki donhok ban ioh ka jingïarap naka jinglah jong ki ban wanrah jingkylla ha katei ka shlem pule.