Nongstoiñ, Naiwieng 14: Ka Seng Federation of Khasi Jaiñtia & Garo People (FKJGP) Kyrshai Area Unit, ka dawa na ka sorkar MDA lyngba ka tnad ka koit ka khiah, khamtam u MLA ba mynta u Bah R.G Momin ban kyntiew kyrdan noh ïa ka Kyrshai Sub-Health Centre sha ka Public Health Centre (PHC).
Kane ka Sub-Health Centre Kharshai ka don ha syndah khappud jong ka Meghalaya bad ka Assam, kane ka Sub-health Centre ka ai ka jingshakri ïa ka koit ka khiah ïa ki 16 tylli ki shnong ha khappud bad ka Assam kaba kynthup ïa ka Kharshai, Mawpun, Nongspung, Ukiam, Borkhuli, Doledonga, Warigro, Hasem, Umthli, Umdiengsyier, Umdiengphiang, Talimara, Mawdiangkop, Dariphang, Umbah, Umkhamdor bad Patharphlang.
Kane ka Sub-Health Centre kaba hap hapoh ka jingpeit jong ka PHC Rambrai, kam don surok kali satia khamtam por lyiur ban poi shaduh Rambrai bad lada ïaid kjat hap ban ïaid haduh 7 bad 8 kynta. Lada leit da kali hap ban ïaid lyngba ka Assam bad haduh ban poi haduh Nongstoiñ ka District Head Quarter bad Rambrai PHC ka bam por da ki palat spah kilometer.
Ki paidbah katei ka thaiñ ki im ha ka sangsot, khamtam katei ka thaiñ kaba jur bha ki jingpang malaria. Ki longkmie bad khunlung ba donkam bha ka jingsumar, kim ïoh ka lad jingïarap na ka tnad ka koit ka khiah. Na ka bynta kiba bun, ka Hospital kaba jan duh ka dei tang jong ka Sorkar Assam hapoh Boko Hospital kaba hap hapoh Assam, kaba jngai na Kyrshai kumba 50 kilometer, kumta bun ki mynsiem ki duh ei ïa la ka jingim tang na ka jingbym biang ki jaka sumar jong ka Sorkar.
Ka Seng ka kyrpad ïa ka Sorkar lyngba ka tnad ka koit ka khiah ban pynkiew kyrdan noh ïa ka Sub-Health Centre (PHC), khnang ba ki paidbah jong kine ki thaiñ kin ïoh lem ka koit ka khiah kumba ïoh ki para nong Meghalaya.
“Ngi ïohi ba bun ki PHC hapoh ka Jylla jong ngi ki jngai tang kumba 10 kilomter lane 15 kilometer kawei na kawei ka PHC sha kawei pat. Kumta ki paidbah ka thaiñ jong ngi kiba im ha kordit khait kaba don ha syndah duh jong ki khappud Meghalaya bad Assam. Ngi sngew ban kyrpad bad kyntu lem sha u MLA ba un peit na ka bynta kane ka khia ka shon ki paidbah ha khappud, ha ka jingïadei bad ka koit ka khiah”, ong u Bah Francis Sohshang President ka seng ka Kyrshai.
